Shillong: Bun napdeng ki riew don sap haki kam ïalehkai ki hap ban ïaid ïaka lynti kaba khim da kaba hap ban leit wat Nongkyrshan (Sponsorship) naki riew shimet lane ki kynhun bad ju don ruh napdeng jong ki, ki hap ban sangeh bad ih noh ïaka kam ïalehkai namar ïaka jingbym lah jong ki ban pyndap ïaka bai lut bai sep. Ïa kane ka juh ka jingeh la mat da i Kong Wandashisha Dewkhaid.
I Kong Wandashisha Dewkhaid i dei i longkmie i bah shong ba sah haka shnong Nongsder, Ribhoi District bad ka trai shnong jong i ka dei Na Mawpet, Mawsynram, i ba trei kum i Anganwadi Worker bad i la don 4 ngut ki khun.
I Kong Wandashisha Dewkhaid i dei i longkmie iba sngewtynnad ban Mareh bad I ba la ju leit ruh ban shim bynta haki lympung Marathon ha kylleng ka Ri India bad kumjuh hapoh ka jylla Meghalaya. Dang shen haka ka 22 haduh 24 tarik jymmang 2024 ha ryngkat bad I Mei Ieid Kmoin Wahlang ki dang shudep ban wan ïa shim bynta haka lympung ïakop Mareh (Track event) ka 1st Pan India Federation Cup National Masters Games-2024 kaba la long ha Telangana bad lyngba ka jinglah jong ki ban jop ha katei ka lympung ki la shah jied pat ban mih khmat naka kynhun India ban leit ïa shim bynta haka jingïakop Mareh kaba 800m, 1500m bad kaba 3000m haka 13th Pan Pacific Masters Games-2024, ka ban long ha u bnai Naiwieng ha Gold Coast, Queensland, Australia.
I Kong Wandashisha Dewkhaid, I la ïathuh ba I trang eh ban leit ïa shim bynta ha katei ka lympung ka ban sa long ha ka ri Australia hynrei I shem jingeh pat ban pynïoh ïaka 50,000 tyngka ban hap siew ïaka bai registration kaba I hap ban pyndep ha shwa ka tarik kaba khatduh kata haka 30 tarik jylliew bad nangta ïaka 2 lakh 20, hajar tyngka (2.20 lakh) ba I hap ban siew hadien ha shwa ban in leit ïalehkai sha katei ka Ri.
I Kong Wandashisha Dewkhaid lyngba kane ka rynsan, I pan ïaka jingkyrshan na baroh ki paidbah khamtam ïa ki nongshong shnong ka Ribhoi kaba dei ka ja ka sah jong I ba kin ïarap ban kyrshan lem ïa I khnang ba in ïoh ban leit ïa shim bynta sha kane ka Lympung. Kumjuh ruh I kyrpad ïaki kynhun bapher bapher bad ïaki nongmih na them Ribhoi ba kin ïarap ïa I ban pyndap ïa katei la jingdonkam jong I khnang ba in ïoh ban leit mihkhmat naka jylla bad kumjuh na ka ri hi baroh kawei.
Nga mareh tang naka bynta ka nam, Nga shem jingeh ban pyndap bai leit sha Australia: Wandashisha
