Shillong: U General Secretary ka United Democratic Party (UDP) u Dr Jemino Mawthoh, ula ong ba ka ilekshon MP Lok Sabha dang shen, ka kylla ym tang ha kane ka jylla hynrei ha baroh kawei ka ri.
Haba kren sha ki lad pathai khubor u Dr Jemino u la ong ba ha ka jingwad bniah ka seng halor ka jingshah rem ka UDP ha kane ka ilekshon kadei namar ba ki paidbah ki sngew ba ka long pyrshah ha ka jingdonlang ha ka sorkar.
“ Watla ngi shah rem ha kane ka ilekshon, ngin nym kynran dien namar ba ha ki por mynshwa wat ki party ki ba don tang arngut ki MLA ki la jop bun ngut bad kiba don bun ki MLA ruh ki la shu hiar kynsan,” ong u bah Jemino.
U General Secretary ka UDP u la ong,“ Ka MP ilekshon ka iapher na ka MDC bad MLA ilekshon, hynrei kaei kaban sa jia nangne shakhmat haba iadei bad ka MDC ileskhon ngim pat lah ban batai namar ka politik ka kylla na ka por sha ka por,” ula ong.
U la ong ba ka jingioh vote ka UDP na ka 2 lak sha ka 44 hajar ka la jah bun ha kane ka MP elekshon bad ka party ka dang bishar ia ki daw kiba pynlong kumta.
U la kyntait ruh ba ka jingdon lang ha ka sorkar kan dei ka daw kaba ktah ia ka party ha ka MP elekshon, namar ba mynshwa ha ka por ba ka party ka don ha ka liangpyrshah, ka hiar shuh ka jingdon ki MLA katba haba ka don ha ka liangsynshar ka kiew ka jingdon ki MLA.
Ula ong ba na ka liang ka party kaba la rim tam eh, kin nang pyrshang ban iaid bteng ia ka jingshakri bad ban nang pynkhlain ia ka party.
U Dr Jemino ula ong ba ka party kan sa shong bad wad kumno ban pynbeit bad kumno ban ioh biang ia ka jingshaniah na u paidbah.
U la ong ba haba don ha ka sorkar, ka party ka la kiew na ka 6 sha ka 12 ngut ki MLA ha ka elekshon 2023 hynrei ka jinghiar ha ka MP elekshon yn hap ban wad ia ki daw.
Ha kajuh ka por, u Dr. Jemino u la ong ba ka party kan pynkhlain sha rilum ruh ha kine ki sngi hadien ba la iasyllok bad ki nongialam katei ka thain.
U la ong ruh ba ka UDP ka kwah ban iatylli jong baroh ki seng riewlum ha ka jylla ban pynkhlain ban iakhun ia ki mat bapher bapher, hynrei kum ka party ka la iaid shibun ki jingad phyllung, ha kaba don ki por ba ka jop bun ki MLA, don ki por ba ka hiar bad ym lah ban tip ba shisien ka sngi kan jop palat ia ka 30 ngut ruh ki MLA.