Shillong: Ka Dorbar Shnong Laitumkhrah Pyllun, ka la hap ban khang noh ia ka painkhana paidbah ha madan Iewrynghep hadien ba ka la lap, ba ka la long pynban ka ktem ban iadih drok bad kiwei ki kam sniew.
Haba kren mynta ka taiew u Jylliew 2024, u Rangbah Shnong ka Laitumkhrah Pyllun, u bah Andrew J Jyrwa u la ong ba ka shnong ka la hap ban khang khyrdep da ki tala ia ki painkhana paidbah ha madan shnong (ha Iewrynghep) namar ba ka kylla pynban ka ktem kam sniew kaba shyrkhei. U la ong ba ha katei ka painkhana la lap haduh 4-5 spah tylli ki thyrnia injek drok, ki jok thep drok da ki spah tylli ha katei ka jaka leit shabar paidbah.
Ka shnong ka la thoh sha ka sorkar ban buh da ka ding jingshai kaba khlain ban pynshynrain ia kiba leh kam sniew hynrei khlem pat long kam haduh mynta.
U la ong ba ka Laitumkhrah ka dei ka jaka sor ha kaba baroh ki briew ki wan na kylleng bad ka dei ka jaka iew kaba long baar ha ka jingheh hadien ka Khyndai Lad, ha kaba ka jingim miet ka dang thnem wat haduh shiteng miet ruh.
Kawei ka jingduh mynsiem ka long ba ki briew kiba shah kem ha ki pulit halor u drok, hynrei ka jingpynshitom ka long kaba synjor haduh katta katta, katkum ka NDPS Act.
Hap khang ia ki painkhana paidbah ha Laitumkhrah ba shlei ki thyrni injek drok
