Shillong: U myntri ka tnad Social Welfare ka jylla u bah Paul Lyngdoh u la kyntu ia ki paidbah, ki kynhun ban kiar na kaba iakynnoh ia ka sorkar kaba iakhun ban ialeh pyrshah ia u drok hynrei, haba don kano kano ka jingduna, ki dei ban ai jingmut, ban iasnohkti lang.
Ka tnad Social welfare ka jylla ka la pyllong ia ka jingiathir halor kumno ban ialeh pyrshah ia u drok ryngkat ka jingiatreilang ka Indian Drugs Users Forum bad ka Meghalaya Drugs Users Forum, ha Vivanta Hotel mynta ka sngi.
U la ong ba ka jingjyllei u drok ka la jubor haduh katta katta haduh ba u la rung la jan ha man ki thliew iing. U la ong ba mynshwa ia ka jylla Meghalaya la tip kum ka jaka iaid u drok sha kiwei ki jylla hynrei mynta ka la long ka jaka ne ka ktem drok uba la rung sha man ki kyndong ka jylla.
Ka jylla Meghalaya ka la knieh shakhmat ha ka jingkhein jong ka jingdon kiba pyndonkam drok ha ka ri. Ha ka ri baroh kawei, ka jingdon kiba dih drok ka la kot sha ka 9 percent katba ha ka jylla Meghalaya, ki la kot sha ka 11 percent.
U la khot ia ki kynhun bapher bapher ba kin wan bad iatreilang bad ka sorkar ban beh krad ia une u iakjakor uba pyntroin ia ki samla, ia ka iing ka sem bad ka imlang sahlang.
Ia kane ka jingiathir jingmut la pyllong lyngba ka Drug Reduction, Eliminate and Action Mission (DREAM), shi bynta jong ka jingrakhe ia ka sngi pyrshah drok ha ka pyrthei.
Shwa ia kane, la ioh ruh ia ka jingkren na u Commissioner ka tnad Social Welfare u Prabin bakshi bad kiwei. La wan iashim bynta ki kynhun bapher bapher ha kane ka jingiathir, kaban ai jingmut sha ka sorkar halor kumno ban iakhun ia u drok.
Kiba pyndonkam drok ha Meghalaya ki don 11 percent, ha ka ri India tang 9 percent
