Shillong: Ka Mawsynram ka don ka Community and Rural Development (C&RD) Block kaba rim tam ha ka jylla bad ka la dei hok ban ioh noh sa ia ka Civil Sub-Division khnang ban pynsted ia ki kam pynroi, namar ba ka dei ka thain kaba shah ieh shrah bha khamtam ha ka surok.
U MLA ka Mawsynram u bah Ollan Singh Suin u la ong ba ka Mawsynram ka don ka Block kaba la seng ha u snem 1962 ha ka por jong ka sorkar Assam bad ka la dei hok ban ioh ia ka Civil Sub-Division. U la ong ba ka Mawsynram kam iapher na ka jingitynnad bad ka Sohra bad ka jingkiew ka kam jngohkai ha kano kano ka jaka, ka shong ha ka jingbha ka surok namar ba ka long kum ka nongpynbna paidbah ia ka jaka.
U la ong ba lada ka surok kam long kaba bha khamtam ba ka Mawsynram ka dei kaba jur slap tam bad kaba dum lyoh bad ki nongwankai kim shlan ban tur namar ba ki syier. Hynrei lada bha ka surok, ki nongwankai kin kham bun wat ha ka por lyiur ban ha ka por rang.
U MLA ka Mawsynram u la ong ba ka surok na Weiloi shaduh Tlongpleng kaba don kumba 38 km, yn sa pynheh noh bad ka la rung ruh ha ka mang tyngka kaba T. 87 klur kaba jrong 38 km.
U bah Suin u la ong ba ka surok na Lad Mawphlang sha Weiloi kala iaid ban shna kum ka Intermediate Road ne ka surok heh ka jylla.
Lah ban kdew ba dang shen ka seng HYNF Southern Border Area kala byrthen ban wanrah paidbah ban tied jingkhang ha Secretariat ban dawa pynbha noh ia katei ka surok kaba la rim bha bad kaba la khim palat, kaba la pynsuhsat ia ka leit ka wan jongki paidbah.
Ka C&RD Block Mawsynram kaba rim tam, ka la dei hok ban ioh Civil Sub-Division, ong u MLA Mawsynram
