Shillong: Hapdeng ka jingiaid lynti kaba shi snem, ka Riverside Adventure Camp jong ka Destiny Self Help Group, Umkaber, ka la khring ia kiba bun ki briew nabar jylla bad kumjuh nabar ri kiba wan iaid kai ban sakhi ia ka jingitynnad katei ka thain ban wan sahmiet ha katei ka ïing basa.
Ia kane ka ïing basa kaba don ha syndad ha wah Umkaber, la pyniaid katei ka Self Help Group jong ki longkmie kane ka shnong Umkaber hapoh ka Hima Lyngiong.
U Lyngdoh ka Hima Lyngiong bah Humphrey Ryntathiang haba kren kum u kongsan ha kane ka sngi, u la ai mynsiem ia ki dkhot jong kane ka SHG, ba kin nang lah ban nang kham pynkhraw nangne shakhamt na kane ka jingsdang.
Ha kajuh ka por, u la iathuh ba kawei ka samla na ri Japan kaba la wan leh ia ka jingwad bniah ia ki law kyntang ha kane ka ri jylla, ka la sngew kyndit haduh katta katta ban iohi ba ka Hima ka don ia ka Law Kyntang, bad ka la ong ba lada ka don kum kane ka law kyntang kaba heh kat ka law kyntang ka Hima Lyngiong, kan long ka briew kaba riew spah tam ha ka pyrthei.
U Lyngdoh u la ong ba ka Hima ka don shibun ki jinglong ka mariang kiba khring ia ka kam jngohkai hynrei ka don ka jaka ba ka sorkar ka la buh hakhmat ban pynitynnad lyngba ka Asian Development Bank hynrei kaba sngewsih ka long ba ka la shah weng noh pynban, khlem tip na kaei ka daw. U la ong ba lada u trai nongbuh nongthaw um pat itbit, yn hap ban iai shah tangba watla katta, u ksew lada u duh doh mynta ha kawei ka sngi un sa ioh hi ka doh shyieng ruh.
Katba u bah Staising Kharbteng uba dei u Sub Inspector ka tnad pule puthi ka South West Khasi Hills, uba na kane ka shnong, u la ong ba ka jingdon kane ka riverside adventure camp kan long kum ka ïit khmih jong katei ka thain ha ka kam jngohkai pyrthei. U la ong ba lada lah ban pynitynnad ia ki jaka jngohkai, ki nongwankai pyrthei kim sahkut tang ha Mawphlang hynrei kin wan ban khrih sha katei ka thain bad kiwei ki jaka ruh, namar ka Hima Lyngiong ka don bun ki jaka jngohkai kiban khring ia ki briew. Ula kyntu ia ki briew ka thain ban long kiba pdiang sngewbha ia ki nongwankai pyrthei namar ba kin wanrah ia ka ioh ka kot.
Ha kane ka sngi la ioh ruh iaka jingkren na ka nongialam ka SHG kong Birona Marbaniang, kaba la iathuh ia ka jingtrei bad ka jingangnud jong kane ka group ban kyntiew bad pyniar ia ka jingtreikam. Kiwei pat kiba ai jingkren ki long na ka NRLM na Mawphlang Block bah A.R.Daman Sohmat, bah Niewkor Syiemlieh na ka Jan Shikshan Sansthan – India, u rangbah shnong bah Changsing Kharbteng bad kiwei.
Khring ka Riverside Camp Umkaber ia ki briew nabar ban thiah miet
