SHILLONG: Ka seng Hynniewtrep National Youth Front -Southern Border Area (HNYF-SBA) ka la byrngem ban wanrah briew da ki hajar na katei ka thain ban tied ia ka jingkhang jong u myntri rangbah u Conrad K Sangma bad jong u symbud myntri rangbah bah Prestone Tynsong.
Ka seng ka la byrngem ban wan tied jingkhang ha secretariat namar ka jingsniew tasam ka surok na Mawphlang shaduh Balat kaba la ju long kum ka mat elekshon man ka por hynrei, kam dei shuh ban long kumta. Kane ka surok kaba shakri ia ki spah tylli ki shnong ka la sniew bad ka la kham palat wat ia ka jingsniew ruh.
Haba kren sha ki lad pathai khubor, u nongialam ka HNYF Southern Border Area u…………..u la ong hato ka sorkar mynta kan ai skhim tang ia ki jaka ba don MLA ka NPP. U la ong baki jingkular ki briew na ka sorkar, ki la shu kut tang ha ka jingkular khlem kam eiei. U la buh jingkylli ia u MLA ka Ranikor bad ka Mawsynram bad kumjuh ia ki MDC kiba don ha ka liangsynshar, ki la dei ban don ka jingkitkhlieh ia katei ka surok kaba la pynsuhsat ia ki paidbah ka thain.
Ka jinglong jingman katei ka surok ka la pynhiar ia ka ioh ka kot ka kamai kajih jong ki paidbah watla ka dei ka jaka kaba don shibun ki kad khaii wat shabar Bangladesh bad shibun ki jaka jngohkai ba itynnad. U la ong ba la ju pynsngew dain shi dain ia kane ka mat naduh mynshwa hynrei ka shu kut tang ha lyer.
Da ki hajar yn wan tied ia ka jingkhang u MR, bad SMR ha Secretariat ba sniew ka surok Mawphlang-Balat
