Shillong: Ka West Garo Hills ka shah ktah jur bha bad mad ia ka jingshlei um man ka por bad ka daw ka dei namar ba ka don hajan ka wah Brahmaputra kaba ju wan kyntur ha ka por ba heh slap.
U Commissioner & Secretary ka tnad Iada mariang ka jylla, u Sanjay Goyal u la ong mynta ka sngi, ba ka sorkar ka la pynkhreh ban shim ia ki lad ki lynti ban iada ia ki briew na ka jingshlei um ha katei ka thain, wat ban pynkynriah ia ki briew sha kiwei ki jaka lada donkam khnang ban lait na kano kano ka jingma.
Katkum ka jingong u Goyal, kiwei ki jaka ka jylla kim da shah ktah than na ka jingshlei lait tang katto katne ha thain Ri Bhoi. U la ong ba ka sorkar ka la bthah ia ki tnad ba dei peit ban leit shim jingthew ia ka jingrit jingsngaid jong ki wah ha jylla, khnang ban tip ia ka jinglong jingman jongki, bad ban iada ruh ia kano kano ka jingshlei um.
Ba wan kyntur ka wah Bahmapura, shlei um ka thain West Garo Hills
