SHILLONG: Ki dakaid na jylla Assam kila shlur haduh ban pyllong ia ka surokbah Shillong-Guwahati kum ka ktem ban lute.
Hynrei mynta ka sngi, saw ngut kila shah kem noh ha ki pulit ka Nongpoh hadien ba ki pulit kila hap ban synreit kuli ia ka kali Bolero rong lieh khlem number jong kitei ki runar, kiba la thmu ban rat ia ka jaka talasi.
Kane ka la jia mynta ka janmiet ha ka por 4:30 baje eiei janmiet ha kaba ki riew paidbah ha Nongpoh kiba don hajan ka Nongpoh Police Station, ki la iohsngew ia ka jingsawa ki ktang suloi, kaba la siat pyntieng da ki Pulit ia ka kynhun ki nonglute, kiba pyrshang ban phet krad.
Hadien ba la kthong ia ki, ki pulit kila ioh ban kem na kawei ka jaka harum Nongpoh bad kine ki runar ki dei baroh na Assam, kiba la wan khnang ban lute na ki trok ha ka thain Umsning, Nongpoh.
La tip kyrteng ia kine ki dakaid kum u Pradip Gogoi na Dibrigarh, u Tulian Phukan na Lakhimpur, u Pranjal Gogoi na Tinsukia bad u Dip Das na Bugaghat, Assam.
U Additional Superintendent of Police ka Ri Bhoi, u Bah Banrap Jyrwa u la iathuh ba ha kaba nyngkong, ki pulit ki la ioh jingtip ba don ka kynhun ki nonglute na ki trok ha ka thain Umtrew, kaba la pyllong ia ki pulit ban mareh bran bran ban thwet ia ki.
La iathuh ba kitei ki runar ki la pyrshang ruh ban rahbor ia u Preenchand Kumar Mali uba dei u nongniah trok na Jharkhand hynrei ki la khynniat noh napoh kali hadien ba la shah kthong ha ki pulit haduh ba u la mynsaw.
Ki Pulit ki la ioh kem ia ki hadien ba la beh thong na ka surok khlaw ha ka thain Downgate, Nongpoh.
Ia kitei ki 4 ngut kiba la shah kem dang pynlong ia ka jingtohkit.
Pyllong ktem lute ki dakaid na Assam ha surokbah ka meghalaya, shah kem 4 ngut na Nongpoh
