SHILLONG: Ka kynhun liangpyrshah ka INDIA Bloc kaba ialam ka Congress ka la pynkhreh ban iakhun iaka shuki Speaker kaba 18 sha ka Lok Sabha lada kam ioh ia ka shuki Deputy Speaker.
Ka dorbar Parliament kan sdang ha ka 24 tarik mynta u bnai Jylliew bad kan kut ha ka 3 tarik Naitung. Ha kane ka dorbar kaban neh 9 sngi, elekshon ia ka shuki Speaker kan long ha ka 26 tarik.
Ha ka Lok Sabha kaba 17, u MP ka BJP u Om Birla ula shah jied kum u Speaker katba ka shuki Deputy Speaker ka sah thylli.
Ka liangpyrshah ka INDIA bloc ka don 233 ngut ki MP katba ka liangsynshar ka National Democratic Alliance (NDA), ka don 293 ngut ki MP.
U MP marwei ka Khasi-Jaintia na ka Voice of the People Party (VPP), kumba la paw ha ki lad pathai, un ym don sha kano kano ka liang , ka NDA ne ka INDIA Bloc.
Shano u MP na Shillong un rai, pynkhreh ka INDIA bloc ban iakhun ia ka shuki Speaker
