SHILLONG: Ka ophis jong u District Sports Officer ka South west Khasi hills District, mynta ka sngi Thohdieng jong ka taiew u la lah ha kaban pynkut noh ia ka lympung bah ialehkai Phutbol jong ki skul katta ka District Level Subroto Cup Football Tournament 2024.
Ha kane ka kynti kaba mynta, ia kane ka lympung ialehkai la pynlong ia ka ha madan Artificial Turf Nonglang.
Ka kyrwoh na u DSO jong kane ka district u bah Damang Syngkon u pyntip ba ha kane ka kynti kaba mynta ki skul kiba la poi ban ia shim bynta ki long Under – 15 years Boys – 27 team, Under – 17 years Boys – 18 teams Under – 17 years Girls – 16 teams.
Haba phai sha ki phainal kiba la long mynta ka sngi ka nam lahduh jong ka U-17 ki khynnah kynthei ka leit sha ka kynhun ki thei ialehkai jong ka Jakrem Pres. Higher Secondary School kaba la wan hadien ba ka la lah ba kan pynliem noh ia ka Rangthong Christian Higher Secondary School lyngba ka tie breaker.
Ha ka phainal ka U-17 ki khynnah shynrang, ka skul ba la rah ia ka nam lahduh dei ka Tenset Secondary School kaba la wan hadien ba ka la lah ba kan pynliem noh ia ka Mawjarain Pres. Secondary School lyngba ka tie breaker kaba long da 3-1.
Katba ha ka U-15 ki khynnah shynrang ka nam lahduh la rah ia ka da ka Little Star Higher Secondary School kaba la pynliem lyngba ka tie breaker ia ka Rangthong Christian Higher Secondary School.
Ha kane ka sngi la ia donlang Damang Syngkon DSO South west Khasi Hills District U Samla Chestarpaul Lyngdoh u nong ialehkai ba paw ka jylla bah D.Mawlein DSP South west Khasi Hills District ki wei de ki riew rangbah kiba la shah khot sngewbha bad la pynshit pynshngaiñ shuh ha kane ka sngi lyngba da ka jingdon ki nonghikai bad ki khynnah kiba la wan ai mynsiem iala ki jong ki kynhun ialehkai.