SHILLONG: Ka Synjuk Ki Rabngbah Kur Ka Bri U Hynñiewtrep, ka la pyniar ia ki shnat jongka da ka ba la seng ha kylleng ka Bri U Hynniewtrep kynthup ha East Khasi Hills, West Khasi Hills South West Khasi Hills bad mynta ka sngi ha Jaintia Hills. Ha ka jingial;ng ba la long ha Ialong Dorbar Hall la kren pynshai shaphang ka jingthmu jong ka Synjuk ha ka ba iada ia ki riti dustur tynrai ba la kren da u Bah Erwin K Syiem Sutnga bad Bah Raphael Warjri. Hadien ka jingkren da kitei ki rangbah la iashim bynta ruh da kiwei kiwei ki rangbah na ka thaiñ ha ka ba ki la kdew byllai ki jingeh ba ia tyngkhuh ha ka imlang sahlang ki ba la ktah shibun khamtam ha ka ba la khynra ia ki riti dustur tynrai da ki briew ba shim kabu ban myntoi lyngba ka khaii pateng bad kiwei kiwei ki jingmyntoi kum ki riewkum jong ka jylla. Ka Synjuk ba la seng ha u snem 2019 ha ka por ba dang long CEM u Bah H S Shylla ha ka Khasi Hills Autonomous District Council ka ba la maitphang ban buhti da ki atiar jong ka aiñ ban shna ki aiñrew ki ba dei ban iada ia ka jaitbynriew. Haduh mynta kita ki aiñrew ki dang sahteng ha ka sorkar jylla bad khlem pat ioh ka jingmynjur na u Lat ka jylla ban pynlong aiñ pura. Jar la katta ka jingpyrshang ka dang iaid shitrhem shaphrang ban kyntu ia ka sorkar ban pynurlong ia ka jingthrang jong ki paidbah ka jylla.
Ha kajuh ka rukom ki rangbah na Jaintia Hills ruh ki la ia synrop lang ha kata ka jingthmu bad la raisynrop ban phah ki jynthoh sha ka Jaintia Hills Autonomous District Council na ka bynta ban pynlong aiñ noh kham kloi. Ha kane ka jingialang la jied ruh ia ki dkhot nongkitkam ia ka shnat jong ka Synjuk Ki Rangbah Kur Ka Bri U Hynñtrep ka ba la jer da ka Dorbar Ki Waheh Kur Ri jaintia. Ki ba la shah jied kum ki nongkit kam ki long u Bah Khroo Lamsalanki Pariat kum u khliehduh (president) Bah Pyrkhat Shylla bad Bah D Donstan Khonglah kum ki Symbud Khliehduh (vice presidents), u Bah Hamkhian Dkhar kum u Saiñpyniar Naphang (General Secretary), u Bah Gremalin H Bareh kum u Symbud Saiñpyniar (Assistant Secretary), u Bah Abutt Nelson Muksor kum u Batsaipan (Treasurer), u Bah Standbyme Sari kum u Sangot (Media Secretary) bad baoh ki rangbah kum ki longsan mansan ha ka Dorbar Nongkitkam ki ba dei artat ki khlieh rangbah jong ki kur lajong ha la ki thaiñ.
Shuh shuh ka Synjuk ka la pynkhreh ruh ban iashem bad ki rangbah kur na ka thaiñ Ri Bhoi ha ka 11 tarik Jylliew 2024 ha Shillong na ka bynta ban seng ia ka shnat ha Ri Bhoi. Khyndiat bnai mynshwa ka la don ka jingiasyllok bad ki Rangbah Kur na Ri Bhoi na ka bynta kane bad la khmih lynti ba yn sa urlong noh kloi lan khamtam ba la thmu ban pynlong ia ka Dorbar Pyllun ha u bnai Nailar 2024. Na ka liang ka shnat na Jaintia Hills la pynkhreh ban pynskhem ha ka 27 tarik Jylliew 2024 ynda la pynbiang da ki nongkitkam thymmai.
La Seng Ia Ka Shnat Jaintia Hills jong Ka Synjuk Ki Rangbah Kur: Ka Bri U Hynñiewtrep
