SHILLONG: U MLA ka North Shillong jong ka VPP, u bah Adelbert Nongrum mynta ka sngi, ula ujor ha ka Meghalaya Lokayukta pyrshah ia 10 ngut ki ophisar ban pynshitom katkum ka ain halor ka jingbym biang ka jingpyntreikam ia ka Saubhagya Scheme ha ka jylla.
Ki 10 ngut ki ophisar kiba la ujor pyrshah bad kynnoh ba ki don bynta ban pyndonkam bakla bad iaid lait ia ki kyndon katei ka skhim ha u snem 2018, ki long u Chief Secretary, Additional Chief Secretary ba peit ia ka tnad bording, u CMD ka MeECL, bad u Director ka MeECL Distribution, Chief Engineer (Distribution), Company Secretary, Chief Engineer Rural Electrification, Chief Account officer ne Deputy Chief Account Officer, Additional Chief Engineer (Material Managament) bad ia u Additional Chief Engineer (Planning and Design) ka MePDCL ba kin dei ban shah pynshitom katkum ka ain halor ki kynrum kynram jong kane ka skhim.
Katkum ka jingong u bah Adelbert, ka sorkar pdeng ka la mang T. 156 klur ia ka jylla na ka Saubhagya Scheme bad, la jied ar tylli ki kompeni ba kynthup ia ka Satnam Global Infra Project Limited, New Delhi bad ka Onycon Enterprise, Mumbai ban pyntreikam ia ka kam ha 2018 jong ka sorkar barim.
U bah Adelbert ula ong ba ia ka jingdkoh bad ka jingpyndonkam bakla ia kane ka skhim, la pynpaw ha ka kaiphod u CAG, kaba la wanrah ha ka ïing dorbar mynshem snem.
Ujor u MLA ka VPP ban pynshitom ia 10 ngut ki ophisar halor ka skhim Saubhagya Scheme
