SHILLONG: Ka jingialang ka executve committee ka Meghalaya Football Association kaba la long mynta ka sngi ha conference room ka SSA Stadium, Polo, ka pyntip ba ka lympung ialehkai Inter Distrct Meghalaya Youth League, la buh ba kan sdang naduh ka 20 tarik jong u bnai Naitung u ban wan.
Ia kane la pynpw da u Secretary bad u Vice President ka MFA u bah Sunesh Syiem bad bah Cliff R Nongrum, haba kren bad ki lad pathai khubor hadien ba la wai kane ka jingialang.
Shuh shuh u bah Sunesh bad bah Cliff ki pyntip ruh ba ha kane ka jingialang ka executive committee kaba la long mynta ka sngi la shim ruh ia ka rai naka bynta ka jingpynkhreh ban pynlong ia ka Meghalaya State League bad kumjuh ia ka Women’s League.
Haba iadei bad ka State League, u bah Sunesh u la ong ba la buh ha ka jingmut ba lada lah ban ioh lei lei sa ka mang pisa, ia kane ka lympung ruh lah ban pynlong ha u bnai Naitung, kaba mut tang naka bynta ki qualifiers kiban pyndap ia ki jaka kiba lait bad ia ka lympung kaba pura pat yn sa lah ban pynlong ia ka ha u bnai Nailar.
Katba ia ka women’s league, yn pynlong kumba la leh ia ka youth league ha kaba ki kynhun ban iashim bynta kin dei lyngba ki district association, kaba lah ban shim por bad ban pynlong ia ka shaduh ki bnai kiba 10 ne ba khatwei jong u snem.
Ha u Naitung yn sdang ka Inter District Youth League ka MFA
