SHILLONG: Ka puron ka Bollywood kaba dei ka MP ka BJP ba dang shu jop, ka Kangana Ranaut ka la kam ba ka la shah thap tyngeh tar na ngap ha kawei ka pulit CISF ha kad liengsuin ha Chandigarh mynta ka sngi.
Katkum ka khubor, ka Kangana ka dang mut ban her sha Dehli bad ka dang ap lain ha katei ka kad liengsuin bad ka la iaid sha khyrdop ban leit kiew sha liengsuin ban her sha Delhi hynrei ka la shah thap pynban tar na ngap ha ka pulit CISF.
Ka khubor ka la ong ba kane ka pulit CISF ka la khie bitar ia ka Kangana halor ka jingkren jongka ha ka jingiakhih ki nongrep ne ka kisan andolan.
Katkum ka jingong ka Kangana Ranaut, ka dang iaid sha jaka ban leit kiew liengsuin haba ka por ba shah thap ha pulit CISF, ka Kulwinder Kaur kaba la iania bad ka bad ai syndon tar shi thab.
La iohi ha ka video ha jaka rung ha kad liengsuin ha kaba ka Kangana ka la shah thap.
Ka Kangana ka la kren ha ka video halor kane ka jingjia, ha kaba ka la ong ba mynta ka sngi ha kad liengsuin ha Chandigarh, hadien ba la shah talasi kumba ju long, ka la iaid hynrei ka pulit CISF ka la leit sha jan jongka bad ka thap na dur khmat jong bad ka la kren khlem akor ruh ia ka. Haba ka kylla balei ka leh kumta, katei ka pulit CISF ka la ong ba ka kyrshan ia ka jingiakhih ki nongrep.
Ha 2021, ka Kangana ka la shah thalain halor ka jingkynnoh jongka, ba ka jingiakhih jong ki nongrep ka long kum ka “Khalistani movement”. La ujor ejahar ia ka da ka Delhi Sikh Gurdwara Management Committee (DSGMC) bad ka Shiromani Akali Dal (SAD), bad kiwei.
La thung jingtohkit halor kane ka jingjia ba shah thap kane ka puron kaba kylla politishian.
Hadien katto katne kynta, katei ka pulit CISF ka la shah sospen noh ha ka bor ba dei peit.