SHILLONG: U Kyrtong ka Regional Democratic Alliance (RDA) u bah Robertjune Kharjahrin watla um shym la poi sha ka thong jingjop ha kane ka ilekshon MP, hynrei ula pdiang sngewbha ia ka rai jong ki paidbah.
U bah Kharjahrin ula ong ba ki nongialam jong ka party UDP bad ka HSPDP ki la trei shitom bad ka jingshah rem jong u ha kane ka ilekshon kadei na ka daw jong u hi.
U bah Kharjahrin ula pynpaw ruh ia ka jingsngew sih namar wat na ka konstiwensi jong u hi na Mawkyrwat kaba u la ai ka jingshakri, ki paidbah ki dang kham sngewtynnad ia u PRAH ka party VPP.
Haba kylli mynta ka 5 tarik Jylliew, 2024, hato ka jingshah rem jong u kadei namar ba ka UDP ka iatreilang bad ka NPP ha ka sorkar MDA, u bah Kharjahrin ula kyntait ia kane namar ba kum ka sorkar ki kam ba bha bad ki jingduna ruh ki bun bad ym lah ban pynhun ia ka jingkwah jong ki paidbah.
Halor ka jingkam u bah Ardent ba ka VPP kan mih bujli ia ki party Seng Riewlum ha kane ka jylla, u bah Kharjahrin ula ong ba ka jingdon ki party thymmai kidei hi ban bujli ia ki party barim hynrei kane kan shong ha ka rai u paidbah hi.
Ka jingrem ka dei na nga, sngewsih ba ka mawkyrwat ruh kham sngew tynnad ia ka VPP: Robertjune
