SHILLONG: U kyrtong ka Regional Democratic Alliance (RDA) uba iakhun na ka shap ka United Democratic Party (UDP) bah Robertjune Kharjahrin ula rem jah burom lut ha baroh 14 tylli ki konstitwensi nalor ki Konstitwensi ba don MDC ha kaba ka UDP bad ka HSPDP ki don ki MLA.
Na Khliehriat kaba dei ka konstitwensi jong u President ka UDP Youth Wing bah Kyrmen Shylla bad u MLA, ka UDP ka ioh tang 4 hajar tam bad shah tam kput haduh 15 hajar vote eiei ha ka VPP kaba ioh 15 hajar tam, na Mookaiaw kaba don u MLA bah Nujorki Sungoh ka UDP ka ioh tang 802 katba ka VPP ka ioh 12 hajar tam, kumjuh ha Amlarem ka UDP ka ioh tang 2 hajar tam katba ka VPP ka ioh 17 hajar tam.
Ha Nongpoh ka UDP ka ioh tang 2 hajar tam katba ka Congress ka ioh 11 hajar tam. Nangta ha West Shillong ka UDP ka ioh tang 1 hajar vote katba ka VPP ka ioh 5 hajar tam. Kumjuh ha Sohiong ka UDP ka ioh tang 19 spah tam katba ka VPP ka ioh haduh 16 hajar, ha Mawphlang ka UDP ka ioh tang 11 spah katba ka VPP ka ioh 22 hajar tam. Ha Mawsynram ka UDP ka ioh 14 spah katba ka VPP ka ioh 13 hajar, ha Shella ka UDP ka ioh tang 19 spah katba ka VPP ka ioh 13 hajar tam bad ha Mawkyrwat ka UDP ka ioh 3 hajar tam bad ka VPP ka ioh 20 hajar tam.
Ha Mairang ka UDP ka ioh tang 8 hajar tam katba ka VPP ka ioh 16 hajar tam. Ka Mairang ka dei ka konstitwensi jong u President rangbah ka UDP u bah Metbah Lyngdoh. Ha Mawthadraishan kaba dei ka konstitwensi ka HSPDP, ka UDP ka ioh tang 8 spah tam katba ka VPP ka ioh 25 hajar tam, ha Ranikor ka UDP ka ioh 6 hajar tam katba ka VPP ka ioh 10 hajar tam.
Nalor ki konstitwensi ba don ki MLA, ka UDP ka don ruh ki MDC kum ka Sohra, Lyngkyrdem-Laitkroh, ka Laban-Mawprem, nangta ka HSPDP ha Mawkynrew.
Liem jah burom lut u kyrtong ka RDA na ki konstitwensi ba don MLA bad MDC
