SHILLONG: U vice president ka Hynniewtrep Youth Council (HYC), u Bah Donboklang Kharlyngdoh u la buh jingkylli, da kaba ong Beaiñ kiba leit shna ïing ha jaka ki briew ne beaiñ kiba leit pynkhuid, beaiñ kiba pynkhuid ia u drug ne beaiñ kiba wanrah ia u drug.
Ki pulit ka nongbah Shillong mynta ka sngi ki la khot hajir sa ia u Bah Donbok sha Sadar Police Station halor ka jingleit kyndang ka HYC ia ki ïing ba la shna beaiñ da ki suba poiwir ha Lum Survey ha ka 23 tarik mynta u Jymmang.
Haba kren bad ki lad pathai khubor u la ong ba kumba ki pulit ki la pynpaw ba ki kwah ban iatreilang halor katei ka bynta, kumta na ka liang ki nongialam ka seng ki la leit ban ai ka jingiatreilang ha kaba iadei bad ka jingjia ha ka 23 tarik.
Kumba ki kwah ban iatreilang ngi lah wan ban iatreilang bad kane baroh kadei lyngba kaei ba ka HYC ka la leh ha ka 23 tarik.
U la ong ba kum u nongialam sengbhalang um sngewphylla shuh ia kum kine ki jingshah khot ha ki pulit, bad pynpaw ba kane ka jingleit jong u sha thanat ka long kum ka jingoynthymmai ia ka licence ieid ri.
Shuh shuh u Bah Donbok u la ong ba ka jingthmu jong ka seng ban leit kyndang ia ki ïing ha Lum Survey kadei ban khynra ia ki nongdie drug kiba wan ka Assam ban riehtngen ha katei ka jaka.