SHILLONG: Ka Voice of the People Party -VPP, kan leit tur beit sha jaka niew vote kaban long ha ka 4 tarik Jylliew 2024, watla ka bor district ka East Khasi Hills ka la pynjari da ka kyndon 144CrPC, kaba mana bym shah ban iaid paidbah ne ban ialum paidbah ban leh kmen ha katei ka sngi.
Ha ka jingpyllait khubor mynta ka sngi lyngba ka video, u President ka VPP u bah Ardent M Basaiawmoit ula ong ba ka party VPP kan mih paidbah beit ban leit sngap ia ka jingniew vote ha katei ka sngi bad ym don ba lah ban khang.
U la ong ba ka long kaba sngewsih ba u DC u la ai daw ba ia ka jingsahkut kali, ne ioh mih kano kano ka kynrum kynram bad kane ka dei kaba sngew thamula ban ioh sngew kum kane ka jingai daw.
U bah Ardent u la ong ba kane ka jingdaw ka lah ban don pynban ka jingthmu barieh sha lyndet ha kaba ym lah ban tip.
U la ong ba ki paidbah kin shad kin kmen da ka akor ka burom, ym ban thaw pynban ia kano kano ka jingkulmar bad ka party ka phah ia ka khubor ba ki paidbah kim dei ban sngap kum ia kane ka jingkhang lad ha ka ri synshar paidbah namar ba ka jylla Meghalaya ka dei kaba shongsuk shongsain.
Ym patiaw ka VPP ia ka 144 CrPC, yn mih paidbah beit ban leit sngap niew vote: Ardent
