Da kaba buh thong ban shimti kum u Myntri Rangbahduh ka ri ha ka sien kaba lai, u Myntri Rangbahduh ka ri u Narendra Modi u la bunkam bha mynta ban leit ialap elekshon kylleng ki jaka na bynta ka Lok Sabha elekshon.
U Modi u la paw ha ka jingiakren bad ki lad pathai khhubor ba bun bah ha kine ki sngi, da kaba ai ia ka kaiphod jong ka sorkar jongu ha kine ki shiphew snem ba la dep, bad kyntait ban don kano kano ka jingma na ka liangpyrshah bad, ki paidbah kin jied biang ia ka Bharatiya Janata Party kaba don ha ka shatri ka National Democratic Alliance.
Ha ka jingiakren bad ka lad pathai khubor News18, haba kylli shaphang ka jingleit ialap elekshon bad ka jingbate por jong u haba ianujor bad u snem 2019, u Modi uba la 73 snem ka rta, u la ong, “Haba I mei jong nga I dang im, nga ngeit ba la kha ia nga kum u briew. Hadien i la khlad noh, haba shim ia ki jingshem jinglap jong nga baroh, nga ngeit ba u Blei u la phah ia nga. Kane ka bor kam dei na nga kum u briew hynrei la ai ia nga da u Blei. Nga ngeit ba u Blei u la ai ia nga ka jinglah, ka jingai mynsiem bad ka jingthmu ba bha..ngam long eiei hynrei tang kum ka atiar. Na kata ka daw, haba nga leh ia kaei kaei, nga ngeit ba u Blei u ialam ia nga”.
U Modi u la kren ia kane ha ka video haba iakren bad ka Rubika Liyaquat ha ka News18 ha ka jingleit jngoh jong u ia ka jylla Uttar Pradesh ha Varanasi ha ka 14 tarik Jymmang 2024. U Modi u iakhun na Varanasi Lok Sabha constituency, kawei napdeng ki 543 tylli ki konstitwensi ha kylleng ka ri. Ka BJP ka kyrmen ba kan jop 370 ngut ki MP nalade, kaba mut kan jop tam sa 67 ngut ki MP na kaba ka la jop ha ka elekshon ha u snem 2019.
Ka elekshon ha ka ri la pyllong ha ki hynniew bynta kaba sdang naduh u 2019. Mynta ka sah sa ar bynta, kaban long ha 25 tarik Jymmang bad 1 tarik Jylliew. Bad ka jingpynbna ia ka result kan long ha ka 4 tarik Jylliew.