SHILLONG: U Vice President ka UDP u bah Allantry F Dkhar u la ong ba ka elekshon ka dei ka elekshon ha kaba ka rai ka shong ha u paidbah iano u jied.
Haba kren halor ka elekshon MP sha ka Lok Sabha kaba dang shu dep shen, u bah Allan u la ong ba kam long kaba suk ban iathuh lypa ia ka jingjop jingrem ha ka elekshon.
Ka UDP bad ka HSPDP hapoh ka shatri ka Regional Democratic Alliance (RDA) ka la pyniakhun ia u bah Robertjune Kharjahrin ha kane ka elekshon MP na Shillong Parliamentary constituency.
U bah Allan u la ong ba kane ka elekshon MP ka khampher haba ianujor bad kiwei pat ki elekshon MP ha ki snem ba la dep, ha kaba la don kiba la kam lypa ban jop hynrei kaba kut ka long ban ap ha ka sngi pynbna.
“Ka elekshon te ka dei ka elekshon, ngin ap ia ka result ha ka 4 tarik Jylliew. Ki paidbah ki jied ha kyndong jar jar ha ka jingstad jong ki”, la ong u bah Allan.
Ha kane ka elekshon MP, ki don san ngut ki kyrtong kiba ialeh na Shillong Parliamentary konstitwensi kiba kynthup ia u bah Vincent H Pala na ka Congress, bah Robertjune Kharjahrin na ka UDP, Dr. Ricky AJ Syngkon na VPP, Kong Ampareen Lyngdoh na ka NPP, u Prof. Lakhon Kma bad bah Peter Shallam kum ki kyrtong shimet.
Ka rai u paidbah kan paw ha ka 4 tarik Jylliew: UDP
