SHILLONG: U manager jong ka kontraktor kaba la pyntrei ia ka surok na Phan Niewlah-Trysad sha Weiloi ula pynshai halor ka jingmih ki khubor ba ka don ka jingsuki ban pyntrei ia kane ka surok.
Ha ka kyrwoh, u manager u la ong ba ha ka jingshisha kam dei satia ba ka suki ne leh sting ka kontraktor hynrei ka daw ka jingslem ka dei namar ba ym ioh ban trei ha ka por kaba biang, namar ba la sdang ha u Nailar 2023 hadien ba la aiti da ka PWD (Road) Mawphlang Division sha ka kontraktor ban trei noh.
Ka jingslem ban ai trei ka sorkar ha ka kontraktor ka dei namar ba ka don ka jingpynbeit pud pynbeit sam hapdeng ka ophis PWD (Road) Mawphlang Division bad ki trai jaka, nongsynshar shnong bad ki myntri jong baroh kane ka surok shaduh Weiloi.
Na ka liang ka kontraktor hadien ba la ioh jingbit, kala sdang shaid shaid watla ka dei ha ka por aiom slap, bad la dep trei lut ban khet ia ka khyndew, ia ki kynroh, ki muri, bad la dep siang GSB bad maw metal. La dep siang rong ruh kumba 2 km eiei. U manager u kwah ban pynshai paidbah ba khnang ba baroh kin tip, ba ia kane ka kam, la ai por 24 bnai ne 2 snem ban pyndep ia ka bad mynta ka la iaid kumba 10 bnai.
U la kyrpad iaki paidbah ban iai shah lem namar ba katba lah yn pynkloi noh ban siang rong tang shu ailad ka suin bneng. Kawei pat ka long ba ka kontraktor ka kwah ban trei tang para Khasi, bun ki shait ong ba lada trei u dkhar ka sted ka kam ka jam hynrei lada long kumne te ka sngew duh jingkyrmen noh.
Pynshai u Manager ka surok Phan Niewlah sha Weiloi ba shah kynnoh suki
