SHILLONG: Ka myntri ka tnad ka koit ka khiah ka jylla ka kong Ampareen Lyngdoh ka la ong ba lada buh shwa ia ka kali nakhmat u kulai, kan long kumba pyndem lypa khlem leh eiei.
Haba kren mynta ka sngi halor ka jingiaid ka jingpynkhreh ia ka Shillong Medical College, ka kong Ampareen ka la ong ba ka sorkar kala dep pynkhreh ha kaba ka la thaw ia ka Society ban pyniaid ia ka Shillong Medical College.
Ki jingtei ruh kila don kiba la biang ban pyndonkam khnang ba ka Medical College of India kan sngew hun haba ka wan ban bishar bad ban ai jingbit ban sdang ia ka jinghikai.
Ka la ong ba lyngba ka jingiarap bad kyrshan ka sorkar India, ka Tura Medical College ruh ka la iaid shait shaid mynta.
Ha kawei ka liang, ka myntri ka la ong ba ka sorkar ka la pynkhreh ban pynbha ia ka mashin Dialysis kiba bha ha man ki hospital ha ki district tangba ia mynta, ym pat lah ban ong ban pynkloi ne em, namar kan sa shong ban iathir halor kane.
Ka la ong ba lyngba ka jingiaid ka por, ka kam sumar ka la don shibun ki jingkylla na ka jingshem buit thymmai ban lap ia ka buit ban sumar. Ka la ong ba ka donkam ban pynthymmai bad ban pynbiang ia ki tiar kiba bit katkum ka juk. Ka la don ruh ka jingpyrkhat ban sumar ha ka ïing ia ki nongpang hapoh ka skhim MHIS.
Lada buh ia ka kali nakhmat u kulai, kumno yn iaid: Ampareen
