SHILLONG:Ka Mawlai SC hadien ba ka la pynliem ia ka Rangdajied United FC da 1-0 kol ka la iohrah ia ka nam lahduh ha ka phainal jong ka Shillong Premier League.
Ia ka shi kol na bynta ka Mawlai FC la thep da u Donlad Diengdoh ha ka 26 minit. Kane ka jinglehkai ka long kaba satar bha ha kaba ka Rangdajied ka la iakhun tyngeh naduh ba sdang ka kylla ba nyngkong haduh ban da kut jong ka kylla baar.
Ka Mawlai kaba dei ka Lahduh ka la iohrah ia ka khusnam trophy bad ka cheque kaba T. 3 lak .Ia kane ka khusnam la sam da u kongsan u Chief Secretary ka jylla Meghalaya, u bah DP Wahlang. Katba ka kynhun kaba wan baar ka Rangdajied ka la ioh pdiang ia ka khusnam pisa kaba T.1.5 lakh na u Chief Engineer jong ka State Sports Council Meghalaya, u bah BM Syiem. Ha kane ka sngi la wan sakhi lang da u President ka Meghalaya Football Association u bah H Dohling, u President ka Shillong Sports Association u bah Eugeneson Lyngdoh nalor kiwei de ki heh nongialam na ka SSA.
Rah ka Mawlai ia ka khusnam SPL 2024
