SHILLONG 28, Jylliew: Ka Congress kan pyrshah beit lada ka long ha kano kano bynta ruh ia ka jingthmu ka sorkar BJP ban wanrah ia ka ain shirong ka Uniform Civil Code (UCC) ha ka ri.
Haba kren mynta u nongialam ka liangpyrshah uba dei ruh u MLA ka Congress na Mylliem, u bah Ronnie u la ong ba ka Congress kan ym ailad ia kane bad kan ieng pyrshah beit da ka bor bad ka buit baroh.
U la ong ba ka Congress kan kyntu ia ka sorkar NPP ba kan iakren bad ka sorkar NDA ba kan pyrkhat ia ki rit paid ba ka dei ban pyrkhat biang shwa ba kan rai halor kane.
“Ngin kyntu ia ka NPP kaba ialam ia ka sorkar jylla ba kan iakren ha ka sorkar NDA ba kan pyrkhat arsien ia ki rit paid shwa ba kan pynlong ain ia ka UCC”, la ong u bah Ronnie.
U la ong ba ka Congress kan iai pyrshah beit ia kane ka ain shirong ka sorkar BJP namar ba la thaw ha ka jingiatylli hapdeng bun jait ki jaitbynriew. “Ia ka ri India kumba ngi tip, la thaw ia ka jingiatylli hapdeng bun ki jaitbynriew bapher bapher ba ngin ia long kawei hapdeng ka jingiapher, jong ka riti dustur”, la ong u bah Ronnie.
U la bynrap, “Ka UCC pat ka jingiatylli kaba tang kawei”, bad kane ka long ka jingma ia ki rit paid.
Lah ban kdew ba ka sorkar BJP ka la pynkhreh ban wanrah ia ka ainrew ka UCC ban pynlong tang kawei ka ain ia baroh ki jait niam ha ka ri khnang ban wanrah ka jinglong ryntih.
Pyrshah jur ka Congress ia ka aiñrew shi rong-UCC
