Shillong, Jylliew 27: Ka Myntri ba khmih ia ka koit ka khia ha ka Jylla, ka Dr M Ampareen Lyngdoh ka la ong ba ki nongkhaïi bad ki nongdie ia ki dohkha ki dei ban buh bad tap bha bad pynthikna ba kin die ia ki mar kiba bha sha ki paidbah.
Ka la iathuh ba ha ka jingiakynduh bad ki nongkhaïi dohkha dang shen ka la kren shai ba ki dei ban buh bad tap bha ia ki mar ban iada na ka jingsniew, namar kadei ka kamram ka jong ki ban ai ia kaba bha na ka bynta ki paidbah.
Ka la ong lada don ka jingleh buit tuh ia ki dohkha ka dei ka kamram jong ki nongkhaïi ban wad hangno la leh thok, namar kum ki nongkhaïi ki dei ban shim ia ka jingkitkhlieh ba ki marbam ba ki die sha ki paidbah kidei ban long kiba shngaiñ. Shuh shuh ka la ong ba ki don ruh ki aiñ na ka bynta kito kiba pynkhein ia ki kyndon jong ka Food Safety bad ka la ong ba ka sorkar kan khang biang ban wanrah dohkha nabar jylla lada ka lap ba ki don biang ka formalin ha ki dohka.
“Lada ngi lap ba ki dohkha ki don ka formalin, ngin hap ban khang biang ban wanrah dohkha nabar jylla, namar ba ngim kwah ba ki jingbam kin long ka jingma ia ka jingkoit jingkhiah jong u paidbah”, la ong ka nongaiktien ka sorkar.
Na ka liang ka Myntri kaba dei ruh ka nongaiktien jong ka Sorkar MDA, ka la pynpaw ia ka jinglynngoh ia ka jingkam jong ki nongkhaïi ba ka shim por tang kumba 4 sngi ban pynpoi ia ka dohkha naduh Karnataka, namar katkum ka jingshisha ban kit da ka kali naduh Karnataka sha Meghalaya kan shim por ym duna ia ka 15 sngi.
Ka la iathuh ba na liang ka Sorkar ka la bthah ia ka ophis Food Safety ban shim khia halor kane bad ban pynlong ia ka jingtohkit ban lap ia ka jingshisha, kumno tang 4 sngi lah ban pynpoi ia ki dohkha bad kumno ki dohkha ki dang I thymmai wat hadien ba la shu buh bun sngi.
Lah ban kdew ba ka Sorkar lyngba ka tnat Food Safety ka la khang ban pynpoi ia ki dohkha na shabar Jylla naduh ka 8 tarik mynta u bnai, hadien ba la lap ba la injek da ka dawai formalin, hynrei ia kane ka jingmana pynpoi dohkha na shabar Jylla la weng noh, bad la sdang biang ban ailad ban die ia ki dohkha na shabar naduh mynta ka sngi ka 27 tarik, ha ryngkat ka jingdon ki ophisar jong ka tnat food safety kiba la shim ia ki nongmuna ban khmih bniah ban pynthikna ba ki dohkha ba la die ha ka Jylla kidei kiba shngain ban bam.
Lada lap Formalin biang ha dohkha, yn khang biang ban wanrah nabar, ong ka kong Ampareen
