SHILLONG 23, Jylliew: Ka Executive Committee ka Khasi Hills Autonomous District Council ka la rai ban kynriah noh ia ka ophis ka Council sha New Shillong bad ka la pan jaka na ka sorkar jylla halor kane.
Haba pyntip ia kane mynta ka sngi, u CEM ka KHADC u bah Pyniaid Sing Syiem u la ong ba ka EC ka la rai ban pynkynriah na ka jaka kaba don mynta, namar ba ka la khapngiah bha, bad ka la pynwit ia ka jingtreikam. Ka KHADC ka don lai tylli ki tnad treikam ba khlain bor ba kynthup ka Executive, Judiciary bad ka Legislative.
Ka jingthmu ban rah sha New Shilllong kan pynsuk ruh namar ba ka sorkar jylla ruh ka la pynkhreh shaid shaid ban pynkynriah iaki ophis jongka sha katei ka jaka.
“Ngi la iohi ba kiba bun ki tnad sorkar jylla kiba la rah lut sha New Shillong bad ngi ruh la sngew dei ban rah noh shatai, ban pynsuk ia ki paidbah ba leit donkam bad kawei pat kane ka ophis kaba don mynta ka la khapngiah ha kaba ka Legislative, Executive, bad ka Judiciary ki don hajuh bad ka la khapngiah, kala thut ia ka leit ka wan bad ka kam ka jam bad dei halor kane, ngi la rai ban pan jaka na ka sorkar”, la ong u bah Pyniaid.
U la ong ba u EM ba dei peit ia ka Council Asset, un iakynduh bad ka sorkar, katno ka jaka ka donkam, ka jingdro dur, bad kiwei ki jingdonkam.
U bah Pyniaid u la ong ba ia ka jaka kaba don mynta ha Karikhana, lah ban pynlong noh kum ka Shopping Complex ne kano kano ka kam kaban ai jingmih ia ka Council namar ba katei ka jaka kaba don mynta, ka biang bha namar ba ka don hajan iew, bad harud surok.
Ha kajuh ka por, u Chief Exeutive Member u la ong ba ka Council kan sdang ban khynra noh ia ki bar jylla ki bym don trading license shen katkum ka Trading By Non-Tribals Regulation Act 1952.
Haba kren mynta ka sngi, u bah Pyniaid u la ong ba kane ka EC ba mynta kan bteng noh shen ban khynra ia ki bar jylla kiba leh kam khaïi hapoh u pud u sam ka Council khlem ka trading license. Kito ki bym don iaka trading license yn phah khang noh shi syndon bad kam ym don ka jingmab iano iano ia kiba leh pyrshah bad ki bym burom ia ka Council.
“Ngi la rai ban bteng ban khynra ia ka trading license ia ki bar jylla kiba leh kam khaïi hapoh u pud u sam ka Council naduh kiba rit haduh kiba heh ruh kumjuh”, la ong u bah Pyniaid.
U la bynrap, “Kito ki bym burom ia ka Council kiba leh kam khaïi khlem ka Trading License, yn sa khang shi syndon”.
Ha kajuh ka por, u la ong baka Council kan shim khia ha kaba iadei bad ka jingiapynbeit pud hapdeng ka Meghalaya bad ka Assam. Tang shu dep ka dorbar, ka kynhun ki MDC kin leit ban jurip sha khappud khnang ban tip iaka jinglong jingman.
Yn kynriah ia ka KHADC sha Mawdiangdiang, lah ban tei dukan ha karikhana
