Da u bah K Mawiong.
Ka jingkylla jong ka saiñ hima sima hapoh ka ïingdorbar thawaiñ jong ka Khasi Hills Autonomous District Council (KHADC) ha ka sngi sdang jong ka dorbar lyiur, haduh ba khyllem noh ka Executive Committee (EC) kaba la ialam da u MDC jong ka UDP na Sohra constituency, u bah Titostarwell Chyne, ka la paw penryngkew ia ka jingkwah jong ka Congress ban don ha ka sorkar MDA -II ba la ialam da ka NPP.
Kane ka la wan hadien ba ka Congress kaba don 6 ngut ki MDC ha ïing dorbar thawaiñ jong ka Khasi Hills Autonomous District Council (KHADC), ki la leit ban ai jingkyrshan bad synroplang noh sha ka kynhun ban ialam da ka NPP ia ka Executive Committee (EC) ba thymmai kiba la thaw ia ka shatri ka Khasi Hills Democratic Front (KHDF) ha kaba u MDC ka NPP na Sohryngkham constituency, u bah Pyniaid Singh Syiem u la shah jied kum u Chief Executive Members (CEM) ba thymmai.
Watla ka Congress ka dei kawei na ki ar tylli ki seng, kaba don ha ka Liangpyrshah bad lam khmat ruh ia ka Liangpyrshah hapoh ka Ïingdorbar thawaiñ jong ka jylla Meghalaya Legislative Assembly, hynrei ka jingleit iatreilang lang bad synroplang jong ki bad ka NPP kaba ialam ia ka sorkar ka dei kaba pynkyndit bad sngew lyngngoh.
Ka jingiatreilang hapoh KHADC hapdeng kine ki artylli ki National party, kata ka Congress bad ka National People Party ( NPP) ka lah ruh ban nang wanrah ia ka jingiajan ym tang hapoh ïingdorbar thawaiñ KHADC hynrei wat ha ka sorkar ruh kumjuh.
Ka jingshah pynkhyllem noh ka Executive Committee (EC) ha ka jingialam jong u bah Titostarwell Chyne, ka lah ruh ban pynkyndit thret ia ki ar tylli ki parti riewlum kiba iatreilang ha ka sorkar Meghalaya Democratic Alliance (MDA-II), kata ka United Democratic Party (UDP) bad ka Hill State People Democratic Party (HSPDP) kiba dang iatreilang bad ka sorkar ba la ialam da ka NPP.
Ka jingshah pynkhyllem noh jong ka Executive Committee hapoh ka lama ka United Democratic Alliance (UDA) ka kynhun synroplang hapdeng ka UDP bad NPP ka la jia hadien ba u MDC jong ka NPP na RambraiJjyrngam constituency, u bah Bajop Pyngrope u la rah ia ka No-confidence Motion pyrshah ia ka ka Executive Committee ba la ialam da u bah Titostarwell Chyne bad, ha kaba kane ka No-Confidence Motion ka la ioh ruh ia ka jingkyrshan na ki 17 ngut ki MDC, kiba dei na ka Congress 6 ngut bad NPP 12 ngut ha ka iing kaba don 30 ngut ki dkhot.
Hynrei kane ka jingpynkhyllem ka NPP ia ka UDP, kam dei kaba leh hi ki MDC hynrei ka dei ka jingbthah na ki nongialam ba hakhlieh jong ka NPP bad kane ka la thew jngai bha ba ka UDP ka lah ban shah leh eiei ha ka sorkar ha kine ki sngi ban wan.
Pynkhyllem ka NPP ia ka UDP ha KHADC da ka jingbthah kiba najrong
