Kut ka lympung ialehkai kynjatbol ki khynnah ha NEHU

SHILLONG 16, Jylliew: Ka lympung ialehkai State Level U-12 Chief Minister Football Tournament ba la pynlong ia ka da ka tnat Directorate of Sports & Youth Affairs ka sorkar jylla, ka la poi noh sha kaba kut mynta ka sngi Thohdieng ka 16 tarik u Jylliew 2023, ha madan ialehkai Phutbol ka SAI STC, NEHU, Shillong.
Ha ka jingiakhun ia ka phainal ki khynnah kynthei, ka kynhun ialehkai jong ka West Khasi Hill ki la pynliem ia ka East Jaintia Hills katba ha ka liang ki khynnah shynrang ka kynhun ialehkai jong ka Ri-Bhoi District ka la pynliem ia ka West Jaintia Hills District da 4-0.

Haba phai sha ka jingiakhun, ia ki 4 tylli ki kol ka Ri-Bhoi la thep u Shanborlang Khongjee lai kol (2, 37, 50) bad sa shi kol la thep u Prin Lang Roi L. Nonglait (20) mins.
Katba ha ka jingiakhun ki khynnah kynthei haduh ba la kut ka por ba la buh, ka West Khasi Hills bad East Jaintia Hills ki la iakhiaid khlem don satia ba lah ban pynkhih ia ka jar bad haba la rah sha ka tie-breaker, ki khynnah jong ka West Khasi Hills ki la jop da 4-2 ia ka East Jaintia Hills.
Kongsan ba la don lang ha kane ka sngi dei kong R.M Kurbah (IAS) Deputy Commissioner East Khasi Hills, nangta u working president ka Meghalaya State Olympic Association u bah John F. Kharshiing, u Ian Campbell jong ka kynhun ka H 10.

Ha kane ka sngi la sam ruh ia ki khusnam ba shimet ba kynthup ia ka nam BEST GOALKEEPER na ka liang ki shynrang ka leit sha ka Subhrata Rabha (North Garo Hills) , BEST PLAYER na ka liang ki shynrang ka leit sha u Shamiki Myrchiang (West Jaintia Hills), na ka liang ki kynthei ka nam best goalkeeper ka leit sha ka BEST GOALKEEPER Larishisha Dkhar (East Jaintia Hills) bad GIRLS BEST PLAYER Nazarine D Sangma (West Khasi Hills)