SHILLONG 08, Jylliew: Ka Commission of Food Safety ka Sorkar Jylla Kong RM Kurbah mynta ka sngi ka la pynjari da ka hukum ban khang pyrshah ban wanrah dohkha nabar jylla hapoh 15 sngi hadien ba la lap ba ki dohkha ba wanrah nabar jylla, la shu injek da ka dawai Formalin ban lait na ka jingpyut bad kaban ktah pat ia ka jingkoit jingkhiah kiba bam ia ka.
Ha ka hukum, la maham ba kiba ialeh pyrshah kin ngat ha ka kuna kaba T. 10 lak ryngkat ka shah set phatok hynniew snem.
Ka Commissioner ka Food and Safety ka la ong ba ha ka jingleh ia ka test jong ki 40 tylli ki dohkha, la lap 30 tylli kiba la injek da ka dawai formalin katkum ka Analysis Report jong ka Assistant Food Analyst jong ka Sorkar Jylla ha ka 6 tarik Jylliew.
La pynjari ia kane ka hukum katkum ka kyndon jong ka Food Safety and Standard Act, 2006 kaba mana ban buh kynton (storage), khaïi bad die ia ki dohkha ba wanrah na shabar ka Jylla namar ba kan buh jingma ia ka jingkoit jingkhiah jong ki briew.