SHILLONG 08, Jylliew: Ka kynhun nongbishar ka High Court, Meghalaya mynta ka 7tarik Jylliew 2023, ka la kyrmen ba ka sorkar jylla bad ki Harijan ba sah ha Them Iewmawlong kin poi noh sha ka jingiabeit shen.
Ka kashari kaba shong bishar mynta ka sngi, ka la buh por ban shim bishar biang ia kane ka mukotduma ha ka 3 tarik Naitung 2023.
Ha ka jingbishar mynta ka sngi, u nongiasaid ain jong ka Harijan Panchayat Committee u la pyntip ba ki harijan kila pdiang ia ka jingpynwan dur ka sorkar hynrei kila ai jingmut ruh ia ki katto katne ki jingpynkylla. Ka kynhun nongbishar ba kynthup ia u Chief Justice u Justice Sanjib Banerjee bad u Justice W Diengdoh ki la ong ba namar ba ka sorkar ka dang bishar ia kine ki jingai jingmut ban pynkylla ia ki katto katne ki bynta, yn shim bishar biang ia kane ka kam hadien lai taiew.
Lah ban kdew ba kane ka kam ka la khihwin naduh u snem 2018 kaba la wanrah ka jingiakhih kaba jur ha u snem 2018 ha baroh kawei ka nongbah ban dawa pynkynriah noh ia ki Harijan kiba sah ha Them Iewmawlong. Ka sorkar jylla ka la thung ia ka High Level Committee ban pule bniah halor kane ka kam bad ka la aiti ruh ia ka kaiphod sha ka sorkar bad ka la shim por san snem tam mynta ba ka la jan poi sha ka jingiabeit hapdeng ki ar liang mamla.