SHILLONG 06, Jylliew: Ka sorkar ka la aiti ha ka Search Committee (SC) kaban kynthup lai ngut ki dkhot ba kan wad ïa ki riew shemphang ba kin long ki dkhot jong ka Experts Committee (EC) na bynta ban pule bad khmih bniah ïa ka Reservation Policy.
Ka jingïalang ka kynhun Myntri mynta ka sngi ka la shim ia ka rai. U Myntri Rangbah u Conrad K Sangma u la ïathuh ba ia kane ka komiti yn khlieh u Chief Secretary ka jylla bah Donald P Wahlang ryngkat ki ar ngut ki dkhot ba kynthup uwei na ka tnad Personnel bad uwei na ka tnat kam aiñ jong ka sorkar jylla ban wad ïa ki stad, ki riew shemphang ban long dkhot ha ka Expert Committee halor ka Reservation Policy.
U la ïathuh ruh ba na bynta kane ka Expert Committee ka sorkar ka la rai ba kan dei ka komiti ban kynthup ïa san ngut ki dkhot.
Ha ka Expert Committee yn don san ngut ki dkhot kiba don ka jingtbit jingshemphang na ki tnad bapher bapher ban wad ka Search Committee bad hadien ba kila ioh ia ki dkhot, kin sa aiti sha ka sorkar ba kan pyndep ia kaba donkam.
Thaw ka sorkar da ka tnad DFS ban eksamin ia ki sakhi
Ka kynhun myntri ka la mynjur ban thaw ia ka tnad Directorate of Forensic Sciences (DFS) ha ka jylla.
Ka tnad jong ka DFS ka la treikam hapoh ka jingpeit ka tnad pulit hynrei katkum ka Human Rights Commission, ia kane ka tnad dei ban thaw la kajong kaban treikam laitluid kaba hap hapoh ka tnad kam pohïing.
U Myntri Rangbah u Conrad K Sangma u la pyntip ruh ba ki nongtrei bad kiwei ki jingdonkam ki la don bad ka donkam tang ka rai ban pyniakhlad ba kan don la kajong ka Directorate.
“Ngi la rai ban pynkhlain ia ka tnad Forensic Department da kaba theh pisa kham bun ban thied ia ki tiar ba donkam”, la ong u Myntri Rangbah.
Lah ban kdew ba namar ka jingbym biang ki tiar ki tar, bunsien ia ki jingjia na kane ka jylla, la hap ban phah eksamin shabar jylla bad kane ka la pynslem bad shim por ban pynsted ia kano kano ka kam.
Ka jingkhot thungkam kan sdang shen
Haba ïadei bad ka jingpynsahngeh shuwa ïa ki jingpynrung kam ha ki tnat sorkar katba ym pat lah ban pynbeit ïa ka Reservation Policy, u Myntri Rangbah u la ïathuh ba ka sorkar ha ka jingïalang ka kynhun Myntri ka la mynjur ia ka Office Memorandum (OM) kaba thymmai ha kaba ïadei bad ka Roster System.
U la ïathuh ba ka kynhun Myntri ka la rai ban ïaid shakhamat ïa ka jingthungkam tang shu mih ka Office Memorandum kaba thymmai jong ka Roster kaban sa mih ha kine ki shisngi arsngi ban wan.
U la ïathuh ruh ba ka rai ka sorkar ban ïaid shakhamat ha ka thungkam thungjam ka dei namar ba lada pynjlan kiba duh myntoi ki dei ki khun samla namar lada iai pynslem ka rta aplai kam ki samla ka lah ban kynjoh sha ka rta ba kim lah shuh ban thep kam sorkar.