Shillong: Katkum ka jingtip ba la ioh lum, la kam ba ka NPP kala pynsangeh ia ka jingthmu u MLA ka Mookaiaw bah Nujorki Sungoh ban iasnoh lang bad ki 8 ngut ki MLA ka UDP sha ka BJP.
Ha ka jingshisha, u bah Nujorki ula don lang ha ka thup bad ki 8 ngut ka UDP ban iakren bad ka BJP, hynrei ula kynran dien noh hadien ba ki nongialam ka NPP kila kular ban ai Civil Sub-Division ia ka Mookaiaw.
Kane ka buit ka NPP kala pynkynran dien noh ia u bah Nujorki ban iaid shakhmat ban iapynbeit bad ki 8 ngut ban iakren bad ka BJP.
Katkum ka jingtip, ka daw tynrai ka jingsat ki MLA ka UDP ia ka NPP, ka dei namar ba kala leh meng leh hangamei khlem burom shuh ia ki watla ki don lang ha ka sorkar. La kynnoh ba ki kam pynroi kiba da ki klur bad ki klur, la ioh kontrak tang ki briew ka NPP khlem pynjaw ia ki briew ka UDP wat ha ka konstitwensi ba mihkhmat ka UDP.
Ka jingdom ki MLA ka UDP kala nang heh hadien ba la kynnoh ba u President ka UDP um don sur eiei ban iakren ia ki nongialam ka NPP.
La don ki por ba ki MLA ka UDP kila iakren ia u President ka UDP wat ban mih noh na ka sorkar hynrei um shym la leh eiei.
Halor kane ka daw, la mih ka jingpyrkhat ban iakren ia ka BJP, kaba dang iaid haduh mynta, khnang ban ioh talaiñ ia ka NPP.