Shillong: Ia ka kot kaba la lum thup ia ka jingkren u myntri rangbah barim ka jylla u bah Brington Buhai Lyngdoh la pyllait mynta ka sngi da u Speaker ka jylla u Thomas A Sangma, kaba ai kyrteng ka “(L) B. B. Lyngdoh – A Tribute to the Visionary Leader and Former Chief Minister of Meghalaya Whose Ideals Continue to Inspire Generations,” kaba la thoh u bah Andrew Simons, u Commissioner & Secretary barim ka Meghalaya Legislative Assembly.
Haba kren ha kane ka jingialang lyngkot, u Speaker ula pyrto ia ki kam ba radbah jong u bah Bring kum u riew iohi jngai ban sain dur ia ka lawei ka jylla.
Haba kdew ba u dei kum u kpa ka sorkar synrop ha ka politik, u Thomas ula ong ba ka jingstad u bah Bring ban wanrah ia kiwei ki seng sain pyrthei ha ka rynsan jong ka jingiatreilang ban thaw sorkar, ka dei ka jingjop kaba khampher tam ha ka sain pyrthei ha kaba ain kyntiap seng ruh kam pat don ha kito ki por.
U dei u nongialam uba la iasaid ban wanrah ia ka jingbuh rekod ia ki jaka puta, ia ka NEIGRIHMS nalor u nongsain dur ia ka MLA Scheme.
Katba u bah Andrew Simons ula pynkynmaw ia ki kam ba khraw bad ka sap jong u bah Bring kum u nongialam hapdeng ki jingtynjuh ba bun ha ka sain pyrthei ha kito ki por.
Ula ong ba u bah Bring u dei uba skhem, uba shi shur bad uba laitluid ka jingmut jingpyrkhat bad u bym ju don nongshun.
Ula kyrmen ba kane ka kot kan long ka par ksiar ia ki pateng ban wan ban wad bniah, ban pule, ban tip ia ka hisority ha ka sain pyrthei ha Meghalaya.
Ka khun jong u bah Bring, ka Kong Syrpailin Khonglah, ka la pynkynmaw ia ka thong jong u bah Bring ban pyllong ia ka Meghalaya kaba roi, kaba dap kaba biang bad kaba khlain. Ka la ong ba ka phang pdeng jong u, ka long ka jingkoit jingkhiah, ka spah ka phew bad ka pule puthi bad ban leh ia kaba dei, ym donkam ban leh bha bad sa ieh ha ka bneng ba kan bishar.
Ha kane ka prokram, la sakhi lang u Deputy Chief Whip ka sorkar, bah Ronnie V Lyngdoh, u MLA ka Sohra bah Gavin Miguel Mylliem, u MLA barim bah Martle N Mukhim, u MLA barim bah Titostarwell Chyne, u Chief Secretary barim bah WMS Pariat, u ambassador barim ka India bah Rudy Warjri, kiba haiing hasem u bah BB Lyngdoh bad kiwei.