Shillong: U MLA bad MDC uba dei ruh u myntri barim ka sorkar jylla u bah Martle N Mukhim ula pynpaw ia ka jingsngewsih ban iohi ba ki seng riewlum kila shah khawah ha ki seng bah na Delhi bad khamtam ka jingiatynrut hapdeng ki seng riewlum ha ka jylla.
Haba kren halor ka jinglong jingman ka sain pyrthei ha ka jylla khamtam hadien ba la mih khubor ba ki MLA ka UDP kin leit iasoh sha ka BJP, u bah Martle uba dei u MLA bad MDC barim ka Mawkynrew ula ong ba ka jinglong ka sain pyrthei ha jylla, ka don ka jingduh jingkyrmen bha namar ba ki seng riewlum kiba kongsan ban peit ki mat ka jylla hynrei ka lyer ka la beh kumba kin lah ban ym don shuh.
Ha u shimet kum uwei na ki nongialam barim bha ki seng riewlum, u sngew kumba shong ha sla dieng watla ym don lang ha UDP.
Ula ong ba lada jia ba ki 9 ngut ki MLA ka UDP kin mih noh, kan don ka jingktah ia ka UDP bad lada ki seng riewlum kin tlot kan long ka jingma bad ka jingktah ia ka jaitbynriew.
Ha kaba iadei bad ka seng VPP, u la ong ba ym nang ong shuh ban ong namar ba I kumba kam don shuh ka synshar paidbah, I kumba shu iakren khynnah lynter wat ha ka iing dorbar ruh bad kam don shuh ka jingiaburom para nongmihkhmat, bad ka long kumba iaknieh doh shyiang ki ksew ha surok.
U sngew khia ia ka jingsah khynnah ha kane ka party bad ula ong ba u Prah u kren ia kaei ka bym lah long bad lada ki wan ha ka bor ruh kim lah bad haba kren lypa ia ka bym lah long, kumno ka lah ban long hynrei kaba sngewsih ka long ba u paidbah um lah kot ban pyrkhat ia kata.
U la ong ba ia u ym don jaka leit namar ba ka party ruh kam pynieng kyrtong ha kane ka elekshon MP shiteng samoi na ka HSPDP bad ha jaka ban thad rong ia ka met lajong, ka bha ba un shu khylliap kti.
Nga sngew kumba shong ha sla dieng | U prah I kumba shu iakren khynnah lynter:Martle
