Shillong: Ki nongialam ka seng longkmie Nongmensong kila pynrem jur ia ka jingkem ia ki dkhot ka KSU khlem bishar shwa ia kiba dei hok ne em.
Mynta ka sngi, kine ki longkmie kila wan ban synran halor ka jingshah khot hajir ar ngut ki nongialam ka KSU na Nongmensong ha ki pulit ha Sadar PS.
Ka kong Marget Khyriem ka President bad ka kong Priya Rynjah ka dkhot ka seng longkmie Nongmensong kila ong ba uwei u dkhot ka KSU um shym la leit iashim bynta ha ka rally hynrei ula shah kem lang. Kila ong ba ka ain kam dei ban leh shiliang ban shu kem ia ki bym dei bad kila buh jingkylli, hato ki bor jong ka ain kila kem ne em ia kito kiba tih ia ka surok ha ka por ba long ka public hearing ia ka Shree Cement Private Limited ha East Jaintia Hills bad kila kem ne em ia kito kiba siat da ki jri ia ki briew.
Mynta ka sngi, u samla Selestine Rynghang u Asst. GS ka KSU Shillong Mihngi Circle bad u samla Samuel Kharbani u GS ka Shillong Mihngi Circle kila shah khot hajir ha Sadar PS halor ka jingjia halor ka jingpyrshah ia ka jingtei mandir hapoh ka phyllaw ka oophis ka CBI hynrei ki pulit kila kem ia ki da kaba pynngat halor ka jingjia ha jingiaid rally ka KSU ha ka 19 tarik mynshem bnai.
Kham hadien la pyllait noh ia u samla Selestine Rynghang namar ba um don ha ka jingiaid rally katba kila thep phatok ia u samla Samuel Kharbani.
‘Ngi khlem pynrem ia ka ain, hynrei balei khlem kem ia uba leh sha Shree Cement’, ong longkmie Nongmensong
