Shillong: U President ka Khasi Student Union (KSU) u Samla Raymond Kharjana ula ong ba kam don ka jingsngewpher lada ka sorkar ka pynngat case 10-20 tylli ruh hynrei kaba donkam ka long ba ki mat ki dei ban urlong noh.
Ki lad pathai khubor kila ioh ban kren ia u ha ka por ba ki pulit ki dang rah ban leit tian bishar sha Kashari District and Session Judge, Shillong mynta ka sngi ryngkat u Vice President samla Pynkmenlang Sanmiet, General Secretary samla Rueben Najiar.
Watla ki iai pyrshang ban pyntroin ia ki nongrim ki jingiakhun ka seng ia ki mat hynrei kin ym lah.
Ula ong ba haba ka CEC ka shim ia kano kano ka rai ka shim da ka jingsngewthuh jingmut bad ka nongrim ba skhlem.
Mynta ka sngi, ki pulit kila tian bishar biang ia ki nongialam ka KSU ha District and Session Judge, Shillong halor ki mukotduma thymmai ha Rynjah police station bad kane ka la dei ruh ka sien kaba saw ïa ki ban shah tian bishar ha kaba kila shah pynngat ruh la bun tylli ki case halor ka jingjia kaba mih ha ka rally ar shaka ha ka 19 tarik Nailar.
Ha kawei ka liang, u GS barim ka KSU u Bah Donald Thabah uba wan synran lang ia ki nongialam ka seng, u la ong ba ka jingpyngat case kawei hadien kawei ka dei ka jingpyndik khnang na ka liang ki bor Sorkar.
Ula ong ba ka sorkar ka kwah beit ïa ki ban shong hapoh along hynrei ki Paidbah ki pynpaw ka jingbitar balei ka sorkar ka shu leh shi leh kumne.
Ula ong ba lada ki leh shi leh kumne ka nangpyntyrha bad ym lah ban ban shu sngap ha kaba wat ki Paidbah ruh kim lah shah.
Pynngat 10-20 tylli ki case ruh, ki mat dei ban urlong noh: President KSU
