Shillong: U President ka NPP Meghalaya uba dei ruh u Symbud Myntri Rangbah ka jylla u bah Prestone Tynsong ula ong ba haba peit ia ki jingkynthoh ne comment ha ki social media, bunsien ki briew ki kynnoh ba ka NPP ka ju thied briew ban wan sha ka jingialang.
Haba ialap elekshon ia u Dr. DRL Nonglait ha Sohra kaba hap ha Shella konstitwensi mynta ka sngi, u bah Prestone ula ong ba kane ka jingkynthoh ki briew ka la pynsngew khain pynsngew riew spah kumba leit sha iew Shella ban thied khlieh dohkha.
Ula ong ba u kwah ban jubab ia kito kiba kynnoh ba ka nongrim ka NPP ka long ba ki committee kiba don ha ki shnong bapher bapher ba kin leit rung sha man ki iing ki sem bad ban peit ia ki shnong ki thaw bad ula ong ba kito kiba kynnoh ia ka NPP, ka dei namar ba kim lah ban pynshit rhem ia ki briew kumba leh ka NPP.
Ula ai nuksa ba haba thung jhur, hap ai um ban ioh kheit ia u soh hynrei kiwei ki bishni namar ba ialade kim lah ban leh kum ka NPP.
Haba ther ba ka social media ka la ialam bakla ia u paidbah, u bah Prestone ula ong ba ka por elekshon MDC 2025, don 2 ngut shi tymmen kiba wan sha u ban pan certificate kaba dei ban ai da u MDC, hynrei haba kylli balei kim leit sha u MDC, kila jubab ba kim ithuh ia u MDC, kim tip ia ka iing ruh namar ba ki shu kyrshan ia u MDC tang namar ba ki iohi tang ha mobile.
Sngew khain sngew riewspah ba ki ong ka NPP ka thied briew | don ba jied MDC tang na mobile, da jop leit wad ym lap: Prestone
