Shillong: Kawei ka kali kala kem ding bad ingkhong khait hadien ba u sainar ilektrik ula hap kynsan ha ka kali katba ka dang mareh ha surok.
Katkum ka khubor na ki pulit, ha ka 28 tarik mynta u bnai, ha ka por kumba 7 baje tam janmiet, kawei ka kali Ecco AS01TC 6015, ka la kynduh ia kane ka jingjia ha shnong Pyrtakuna katba ka dang mih na Lumshnong ban leit sha Umkiang, East Jaintia Hills.
Ha ka jingtohkit ki pulit, la lap ba kane ka kali ka dang wan na Lad Rymbai ban leit sha Badarpur, Assam hynrei ynda ka la poi ha shnong Pyrtakuna ka surokbah NH-6, uwei u sainar high voltage uba sdien ldui najrong ula hap kynsan bad dei ha kane kali haduh ba ka la shah thang ingkhong syndon bad uwei u nongshong ha kane ka kali, ula shah thang lang bad hap hashen katba u driver ula lait im bad ula jah klep haduh mynta khlem lap dien.
Ia ka met une uba khlad la rah sha Khliehriat Civil Hospital bad la buh ha jaka buh met iap hadien ba la pyndep ia ki jingdonkam baroh.
Na ka EPIC, u Aadhaar card, la tip kyrteng ia une u briew kum u Riyaj Uddin na Mamadpur, Madammohan, Karimganj, Assam.
Kem ding ka kali ba hap u sainar ilektrik katba dang mareh ha surok | iap uwei, jah u driver
