Shillong: Ka Khasi Students’ Union (KSU) Central Executive Council ka pynpaw ia ka jingbym sngewtynnat halor kaei kaba la jia ha ka step synñia ha Shillong, ha kaba kawei ka Scooty ba la ñiah da ki briew kiba ym pat shym la pynshai kyrteng, ka la tynrah ia u Additional SP jong ka Tnat Pynïaid Kali uba dang don ha ka kam.
Ka Seng ka sngewkhia halor kano kano ka jingjia kaba lah ban pynmynsaw ia ki briew lane ia kino kino ki briew ka ain bad ki paidbah. Hynrei, kaba pynlyngngoh bad pynkyndit ia ka Seng ka long ka rukom kaba la sdang mih ki jingkynnoh, khamtam ha kaba la pynïasnoh beit ia kitei ki nongñiah Scooty bad ka KSU.
Ha ka kyrwoh, kaba la pyllait u bah Pynshai Kupar M Dkhar u Information and Publicity Secretary, KSU CEC ula ong ba katkum ki khubor kiba la mih na ka police department la suba bad kynnoh ba kitei ki briew ki dei ki dkhot jong ka KSU. Hynrei ka jingkylli ka long: Ha kano ka nongrim la pynshong nongrim ia kane ka jingkynnoh? La ioh jingtip shisha ne tang ka jingmutdur? Ka seng kan ym lah ban pdiang da lei lei ruh ia kine ki jingkynnoh ba khlem shongnia.
Hato kino kino kiba ñiah Scooty ha nongbah Shillong ki dei ban long ki dkhot ka KSU? Lane lada don ka jingjia ba pynkyndit, kan suk ban shu kynnoh sha ka Seng kaba don ka kyrteng ha ka imlang sahlang?
Ka KSU ka pynrem jur ia ka jingpyrshang ban pynsaphriang ia ki jingkynnoh kiba khlem pynshisha bad nongrim. Lada don ki briew kiba la pynkheiñ aiñ, to kem ia ki, pyni ia ki sakhi, pyni ia ki dur CCTV lada don, bad pynshisha ha ka Ïingbishar. Ka aiñ ka dei ban treikam halor ki sakhi, ym halor ka jingmutdur lane ka jingkynnoh.
Ula ong ba lada ki Pulit ki don ki sakhi kiba pyni shai ba kitei ki nongñiah ki dei ki dkhot ka KSU, ki dei ban pyni ïa ki sakhi bad shim ïa ka lynti katkum ka aiñ. Ka KSU kam kyrpad ia kano kano ka jingisynei lada don dkhot jong ka Seng kiba la leh bakla. Hynrei ka Seng kan ym ailad ruh ban pynjot ia ka kyrteng jong ka tang da ki jingkynnoh kiba khlem nongrim.
Ka KSU ka pynshai ba ka Seng ka tip bha ia ka jingkitkhlieh jong ka kum ka seng bad ka kyrshan ia ka aiñ bad ka jingshngaiñ ha surok, hynrei ka pyrshah jur ia kano kano ka jingpyrshang ban pyndonkam ia ka jingjia kum kane ban pynjah burom lane ban pynsaphriang ia ki jingkynnoh pyrshah ia ka Seng khlem da don ki sakhi kiba shai.
Ka kyntu ia ki bor pyniaid kali bad ki Pulit ban pynlong ia ka jingtohkit kaba khuid, bad kaba pynshong nongrim tang ha ki sakhi. Ym dei ban don ar tylli ki dur jong ka aiñ kawei ia ki paidbah bad kawei ia kiba don ha ki seng.