Shillong: Ka Executive Committee (EC) ka KHADC ka la pynmih ia ka hukum ba la pynkiew khet biang ia u Paiem Ainam Manik Syiem kum u Syiem ka Hima Mylliem hadien ba ula shah sospon.
Ha ka jingpynmih ia ka hukum ha ka 14 tarik Nailar 2026, u Secretary ka KHADC, la pyntip ba katkum ka jingrai ka jingbishar kaba 11.08.26, ka Executive Committee ka KHADC, ka la pynkiew khet biang ia u Ainam Manik Syiem kum u Syiem ka Hima Mylliem katkum ka jingmih na ka dorkhas ka mukotduma W.A No 42 jong 2026 bad ka W.A No 43 jong 2026 kaba dang sah ponding ha ka High Court, Meghalaya.
Ka Executive Committee ka KHADC ka la btha ia baroh ar ngut, u Ainam Manik Syiem bad u Alban Fedrick Syiem ban bud ia ki kyndon ban aiti ia ki rekod, ki jingdon jingem bad kiwei shwa ka 18 tarik Nailar 2026 kumba la kdew ha ka Sub-Section 3 jong ka Section 8 ka Khasi Hills Autonomous (Appointment and Succession of Syiem, Deputy Syiem, Electors and Rangbah Shnong of Mylliem Syiemship Act 2007, da ka jingbthah ia u Ainam Manik Syiem ban buh ia ki rekod kiba iadei bad ki dorkhas mukotduma ba dang sah ponding.
U Secretary ka Executive Committee ka KHADC un sa phah ia ki ophisar ban pynbeit ia ka jingaiti kloi katkum ka ain.
Ha kawei ka liang, ha ka shithi kaba 14.08.26, u Acting Syiem u Alban Fedrick Syiemk aba la thoh sha u Ainam Manik Syiem, ula pan ia ka hukum kaba ioh na ka bor ba dei peit bad u long uba kloi ban aiti ia ka khet katkum ka Section 8 ka clause 3 ka Khasi Hills Autonomous (Appoinment and Succession of Syiem, Deputy Syiem, Electors and Rangbah Shnong of Mylliem Syiemship Act 2007 ha ka jingdon lang ki nongsakhi ban lait na kano kano ka jingkulmar.
Shwa ka 18 tarik, hap ia khublei kti u paiem Ainam bad u paiem Alban hakhmat ka KHADC
