Shillong: Ka cabinet mynta ka sngi ka la rai ban ai scheme T. 25 hajar ia kito kiba thied kali electric nalor ban pyllait ei ia ka bai registration.
Kane ka long ba ka sorkar ka la mynjur ia ka Meghalaya Electric Vehicle (EV) Policy 2026 ban kyntiew ia ka jingkhuid jingsuba ia ka mariang ha ka jylla.
Haba pyntip sha ki lad pathai khubor hadien ba la wai ka cabinet, u myntri u Marcuise N Marak ula ong ba kane ka polisi ka dei ka jingkut jingmut ka sorkar ban wanrah bad ban tei ia ka jylla kaba jyrngam, da kaba pynduna ia ka jingjaboh ka lyer na ki kali kiba pyndonkam da ka petrol ne diesel.
Kiwei pat ki rai ka cabinet ki long ba ka la mynjur ia ka ₹22.37 klur ban siew bai jaka ban shna ia ka 132 kV D/C Transmission Line na 220/132 kV Saisiej Substation sha ka 132/33 kV, 2×50 MVA Mawkhanu Substation.
Ka cabinet ka la mynjur ruh ia ka jingpynkylla ia ka New Shillong Township Development Agency sha ka New Shillong Development Authority (NSDA) da kaba pynkylla ia ka New Township Development Agency Rules, 2012.
Ka la mynjur ruh ia ka jingbteng kam u bah B M War, Retired Chief Engineer (Civil) ka Meghalaya Energy Corporation Limited (MeECL) kum u Chief Technical Adviser (Generation).
Shuh shuh ka la mynjur ia ka Meghalaya Border Areas Development Department (Research Wing) Service Rules 2026 bad kaba khadduh ka la mynjur ka dei ia ka jingpynbeit pali ia ki heh sorkar ban pynher lama ka ri India ha ka sngi laitluid.
T. 25 hajar yn ai scheme ka sorkar kiba thied kali electric, rai ka cabinet nalor kiwei
