Shillong: Ka seng Meghalaya Commercial Trucks Owners and Drivers Association (MCTODA) ha ka sngi Nyngkong ka la sngewkhia jur halor ka jingbym shim khia ki sorkar jylla ka Meghalaya bad Assam ban wad ia u bah Mewari O Dkhar uba la jah ha Assam.
U bah Mewari O Dkhar u dei na ka thaiñ Nartiang, West Jaiñtia Hills bad uba dei ruh uba ju ñiah kali bad u la jah naduh ka 3 tarik mynta U Naitung.
U kpa jongu, u Bah Treilem Shylla u la kyrpad ïa la u jong u khun ban wan phai noh sha la iïng naba ki khlem buh jingsuba sniew eiei ïa u bad kumjuh ruh u la kyrpad ïa ka Sorkar jylla, lyngba u Symbud Myntri Rangbah ka jylla u Bah Sniawbhalang Dhar ba un shimkhia lem ïa kane ka kam.
U Chairman ka MCTODA u Bah Moslander Marngar, u nongaiktien u Bah Wanshwa Nongdtu, u General Secretary u Bah Peter Marbaniang ki la ïathuh ba u Bah Mewari O Dkhar u la jah naduh ka 3 tarik mynta u bnai bad mar ïa ïoh jingtip halor kane, ka seng ryngkat lang bad ki bahaiing ha sem ki la ialeit wad jingtip bad kumjuh ruh ban ujor da ka ejahar ha Guwahati bad kumjuh ruh ha ri Bhoi.
U la ïathuh ruh ba u Bah Mewari udei ruh uba ju ñiah ïa ki trok kit dewbilat na Jaiñtia Hills bad kumjuh ruh uba ju minot bha ïa ka kam. U Bah Marngar u la kynnoh ruh ïa ka Sorkar Jylla bad kumjuh ruh ka sorkar Assam ba kim lah ban shim khia naduh ka Sngi ba ki la ujor halor ka jingjah noh jong u Bah Dkhar.
Ka MCTODA ka la ong ba ki briew na Meghalaya ki leit shabar jylla ym ju kham ïoh jingtip shuh satia, hynrei ka pynpaw pat ka jingkyrmen ba u Bah Mewari O Dkhar un phai noh sha la ka ïing ka sem da kaba suk ba saiñ.