Shillong: Ka jaitbynriew Tiwa ne Lalung kiba bun kiba sah ha them Bhoi bad ha kiwei ki bynta ka jylla, kila dawa na ka sorkar Meghalaya ba ka la dei ban ai ne ithuh noh ia ki kum ki Schedule Tribe ha ka jylla.
Ka jaitbynriew Tiwa ka la ju iashim bynta ruh ban thep vote ha ka elekshon ha ki District Council ha ka jylla Meghalaya.
Mynta ka sngi, ka All Tiwa Students’ Union (ATSU), Meghalaya State Committee, ryngkat bad ki kynhun bapher bapher jong ka jaitbynriew Tiwa (Lalung), ka la kyntu jur ïa ka Sorkar Meghalaya bad ka Sorkar India ban ithuh noh ïa ka jaitbynriew Tiwa (Lalung) kum ka Scheduled Tribe (ST) ha Meghalaya bad ban pynrung ruh ha ka khanasamari 2027.
U General Secretary ka ATSU u Albert Dilar la ong ba ka Tiwa (Lalung) ka dei kawei na ki jaitbynriew trai ri trai muluk jong Meghalaya bad ka histori ka sakhi ia kane. Ki la pynpaw ïa ka jingsngewkhia ba ha ka thup jong ki Scheduled Tribe kaba la pynkhreh na ka bynta ka Census 2027 ym shym la don satia ka kyrteng “Tiwa” ne “Lalung”, watla ka jingkheiñ ïing bad ka jingthoh kyrteng ïing kan sdang naduh u Nailar 2026.
Ka ATSU ka la ong ba la palat lai phew snem mynta ba ka jaitbynriew Tiwa ka la dawa ïa kane hynrei haduh mynta kam pat urlong.
Ka seng ka la ong ba ka jingialeh jong ka ka long kaba jai jai bad kaba bud ïa ka riti synshar paidbah, hynrei lada ym shimkhia ïa kane ka jingdawa kaba la slem bha, kin sa hap ban wad ïa kiwei pat ki lad ai jingïada kiba ai da ka riti synshar paidbah.