Shillong: Halor ka ejahar kaba la ujor da ka kong Balapynhun Nongrum, kaba dei na Mawkyrwat, South West Khasi Hills, la pyntip ba ka para jongka, ka la khlad ha kaba la kynnoh ba ka la leh ia kane, da kaba phasi ha ka 19 tarik Iaiong, 2026 ha ka por 6:40pm na ka jingshah pyntieng, shah byrngem ha uwei u briew ha kaba la kynnoh ba ula byrngem ban pynsaphriang ia ki dur bad ki video jongka ha rynsan social media.
Halor kane, ki pulit ka Women Police Station ka South West Khasi Hills, Mawkyrwat kila shim kam bad rejister ia kane ha ka kyndon 77/79/351(3)/108 ka BNS bad ka Section 66E/67A IT Act bad pyllong ia ka jingtohkit.
Ha ka jingtohkit ki pulit, kila buddien bad lap ia une u briew uba dei na Surat District, ka Gujarat bad kila ioh kem ia u ha ka 23 tarik Jylliew 2026 por 2:30 PM ryngkat ka jingiarap lang ki pulit ka Palsana Police Station, Surat District, Gujarat.
Ia une u briew la tip kyrteng kum u Sachin Nishad (22 snem) uba sah ha Bhidoor, AmbedkarNagar, UP kaba hap ha PS-Baskhri.
La tian ia une u briew ha ka kashari bad la ioh jingbit ban kit ia u sha Meghalaya lyngba ka jingbit na u JMFC, Surat.
Halor kane, ki pulit ka South West Khasi Hills kila kyrpad ia ki paidbah khamtam ki samla bad kiba ngat ha ki jingshah riam kim dei ban shim ia la ka jingim hynrei, ki dei ban husiar na ki riew sniew lyngba ki rynsan social media bad kila kyntu ba kin wan shakhmat ban ujor sha ka ain.
Kiba ngat ha ka jingshah riam, ne shah byrngem ki dei ban pyntip ha Emergency Police Assistance: 112, Cyber Crime Helpline: 1930, National Cyber Crime Reporting Portal: www.cybercrime.gov.in, Women Helpline: 181, District Police Control Room: +91-8415886486,
District Mental Health Helpline Number: +91- 9612889267.
Phasi ka samla ba na Mawkyrwat ba byrngem thad u briew na Surat ia ki dur, ki video jongka
