Shillong: Ka Executive Member ka KHADC kaba peit ia ka tnad ain, ka kong Deity H Majaw ka la ong ba ki don 3 ngut ki nongiasaid ain ne ki standing counsel ka KHADC kiba dei ki Khasi nalor uwei u bym dei Khasi.
Ia kane ka la jubab halor ka jingkylli kaba la kylli bynrap u MDC ka Laban-Mawprem u bah Ricky Shullai halor ka jingkylli kaba la wanrah da ka MDC ka Nongshken ka kong Grace Mary Kharpuri ha ka dorbar mang tyngka ka KHADC mynta ka sngi.
Ka la ong ba ym dei ban sngew tieng ba ka Council ka thung ia u bym dei Khasi namar ba ki don ruh ki Khasi kiba la thung ban iasaid ryngkat bad u.
Ka Kong Deity ka la ong ba ki don 85 tylli ki mukotduma ka KHADC ha High Court, Meghalaya haduh mynta, kiba ka Council ka dang iakhun.
Halor kawei ka jingkylli pat kaba la thung da ka Executive Committee ia ka Sub Committee ban pule bniah ia ka Rules 128 ka Assam and Meghalaya Autonomous Districts (Constitutions of District Council) Rules 1951, ka kong Deity ka la ong ba la thaw ia ka Committee ban pule bniah namar ba ia kane ka AD Rules la wanrah ia ka jingpynkylla ha 2018 hynrei ka EC kaba mynta ka kwah ban kham pynjanai shuh ia kane.
Ia kane ka jingkylli la wanrah ka MDC ka Nongpoh ka Kong Rona Khymdeit.
Na ka liang u bah Titosstarwell Chyne u nongialam liangpyrshah, u la bynrap ba ka long kaab sngew sih ba ka EC ka la kyntait ban shim lang ia ki MDC na ka liangpyrshah ban don ha kane ka committee bad ym tip, kaei ka daw ba u CEM u dom ia ki liangpyrshah wat haba ki la iakynduh ia u ban don lang kum ki dkhot ha kane ka Committee. U bah Titosstarwell ula ong ym dei ba ki kwah eh ban long dkhot ha kane ka Committee hynrei ka dei ka jingsngew khia na ka bynta ka lawei ka Council.
Hynrei na ka liang ka EM ka kong Deity ka la ong bai a mynta ka EC kam pat da donkam than namar ba ka kam kane ka Committee ka dei tang ban pule bad peit ia ka AD Rules bad ka Amendment jong u 2018.
Halor ka jingkylli bynrap u MDC ka Laban-Mawprem bah Ricky Shullai haei ka la don ka Amendment ka AD Rules 2018, ka kong Deity ka la ong ba kane ka la don ha jingbishar ka EC ha kaba ka sorkar jylla ka la phah biang ba ka pan jingshai.
Nalor bym dei Khasi, don ki Khasi ruh: Deity |imat u CEM u dom ia ngi ka liangpyrshah: Titos
