Shillong: U CMD ka MeECL u Sanjay Goyal ula ong ba jingdonkam bording ka jylla ka biang bad kam don eiei ban don ka jingpyllip ding ne load shedding.
Hynrei ha kajuh ka por, ula ong ba ka jingpyllip ding, ka jia tang haba ka don ka jingmaramot ia ki waiar, ki nar ilektrik, ka jingpynheh iaka transformer kaba dang iaid mynta ha kiba bun ki jaka.
Haba kren sha ki lad pathai khubor, u Goyal ula ong ba shwa ban pyllip ding, ka MeECL ka ju pyntip bad iasyllok ia ki nongkitkam shnong khnang ba ki paidbah kin tip ban leh ia kaba donkam hynrei kam don satia ka jingpyllip pathar lait noh tang teng khat na kano kano ka jingjia.
Ha kajuh ka por, u la ong ba ka sorkar India lyngba ka PM Surya Ghar: Muft Bijli Yojana, ka la ai jingiarap ban buh ding sngi ha tnum iing haduh 3kw.
Ia kane ka skhim la pyntreikam da ka MPDCL ha kaba ki briew ki lah ban aplai online ha kaba ka sorkar ka ai jingiarap T.33 hajar shi kilo watt haduh 3 kilo watt kaba long 80 hajar tyngka ia ki jylla ha North East.
Ula kyntu ia ki paidbah ban wan shakhmat ban shim ia kane ka kabu ban buh ding sngi ha ki tnum iing jongki lyngba ki jingiarap ka sorkar.
Ka bording ka biang, shu pyllip haba don jingmaramot, ong u CMD ka MeECL | T.80,000 ka iarap ban buh ding sngi ha tnum
