Shillong: U Secretary ka Raid Mawshuit bah Kyntiewbor Khongshei ula pynshai halor ka jingiadei jongka Raid Mawmang ha kaba iadei bad ka Hima Sohra, ha kaba ula batai ba katkum ka riti dustur bad ka niam ka rukom ka Hima Sohra, ka Raid Mawshuit ka dei ka nongpynsum pynsleh ia u Syiem, ka Raid Mawmang pat ka long ba haba don kano kano ka jingialeh ne ka thma, u hap ban ieng ban iada ban lait na ka jingiap.
Haba kren sha ki lad pathai khubor mynta ka sngi, u la ong ba ka Raid Mawshuit ka dei ka nongpynsum pynsleh, kaba pynbit ia ka Hima baroh kawei bad ia u Syiem.
U bah Kyntiew ula ong ba ka KHADC ka dei ban ai sanad noh ia u Marremdor Syiem namar ba ka jingthung Syiem la leh katkum ka riti dustur katkum ka ktien hok ka nia hok bad ka Raid Mawshuit ka la pyndep ia ka jingpynsum pynsleh ia u Marremdor Syiem kum u Syiem ha u bnai Kyllalyngkot.
U la ong ba ki don shibun ki bynta ban iathuh tangba kim sngew dei ban iathad ia ka kam iing kam sem ka Hima bad ka KHADC kam dei ban khein dewthala.
Katba u bah Rothel Khongsit ula ong ba ka long kaba sngewsih ban iathad ha rynsan social media ia ka kam iing kam sem ka Hima.
Ula ong ba katkum ka riti dustur ka Hima Sohra, haba iap u Syiem, ka dei ka Raid Mawshuit kaban pyndep ia kane bad ban pynsum pynsleh ia u Syiem ruh ka dei ka Raid Mawshuit katkum ka riti dustur.
Bah Rothel ula ong ba ka bynta ka Raid Mawmang ka long ban pynieng ia ki ryngkew ki basa haba don ka thma ka jingialeh hynrei mynta ula iaid lait ia ki 11 sordar ka thain 12 shnong bad ula mih ban ujor sha KHADC. Ha ka jingshisha, lada u don kano kano u dei ban rah ban pynsngew, iamir iasyllok ym ban iathad sha bar.
Ka jingpynshai ha kaba iadei bad ka Raid Mawmang, Raid Mawshuit halor ka hima Sohra
