Shillong: U nongialam ka FKJGP bah Kit Nongphlang ula kam ba katba dang iaid ka jingiakren hapdeng ka bor na Meghalaya bad na Assam halor ka Lapangab, ki don ki nongrep na Lapangab kiba shah siat jri, shah knieh ia ki wait ki mohkhiew ha ki briew na Assam.
Ki nongialam sengbhalang na ka FKJGP, bad KSU kila hiar sha Lapangab mynta ka sngi ban ai mynsiem ia ki nongrep katei ka shnong.
U bah Kit Nongphlang u la ong ba kine ki nongrep ki thmu ban leit rep sha ki lyngkha ki pynthor jongki hynrei kane ka la jia pynban katba ka jingiakren hapdeng ka kynhun na Meghalaya bad na Assam ka dang iaid.
U bah Kit Nongphlang ula ong ba ka seng bhalang ki leit sha katei ka jaka na ka bynta ai mynsiem ia ki paidbah ka Lapangab kiba la iakynduh jingeh na ka jingshah pynthut ha ki briew na Assam kiba khang lad ia ki nongrep na Lapangab ba kin leit rep leit riang ha ki jaka jongki.
Ula pynrem jur ia ki nongialam ka sorkar MDA khamtam ia ki Symbud Myntri Rangbah kiba la kren sarong haba ki plie ia ka Police Outpost ha katei ka thain katba ki briew pat ki dang shah thombor.
Ula ong ba ka seng kan leh ia kaba donkam ban buddien halor kane ka kam, ban pynthikna ba ki paidbah Lapangab kin dei ban shah pynthut bad kin ioh ban shong suk shong sain.
Katba dang iaid ka jingkren, shah knieh wait, mohkhiew, shah siat jri ki nongrep Lapangab
