Shillong: U Myntri Rangbah Conrad K Sangma u la hiar jrup na kali hapdeng surok ha Jaiaw Pdeng hadien ba ki nonghikai jong ka sobjek Vocational kila ap triang ha katei ka jaka ryngkat ki plakad.
Ki nonghikai Vocational kila rah plakad ban pynsngew sha ka sorkar ia ka jingshah leh shiliang jongki, ha kaba kila kam ka sorkar ka la pynkiew tulop ia ki nonghikai skul SSA, katba ia ki pat, kam shym la pynkiew watla ki dei kajuh ka skhim kaba hap ha ka SSA.
Katba dang mih ban leit phai na ka prokram ha Madan Student, Jaiaw, mar ia poi ha Jaiaw Pdeng, u Myntri Rangbah ka jylla u Conrad Sangma ryngkat ka jingsynran ki pulit, um shym la iaid beit hynrei ula hiar hadien ba la iohi ia kine ki nonghikai kiba pynap da ki plakad hakhmat ka surok. Ula leit kren bad khublei kti ia ki bad ula pule ruh ia ki jingthoh ba kila pynsngew bad ula kular ban pyntip ia ki ban khot iakren halor ki mat ba ki dawa ban pynkiew tulop lang kumba leh ia ki nonghikai SSA.
Kine ki nonghikai jong ka subjek vocational ki don tang kumba san ngut eiei, ha kaba nyngkong kila wan rah plakad na kyrpong ka pandal na surok kaba wan na skul Synod bad hadien ba la shah khang noh ha ki pulit, kila leit rah plakad noh sha Jaiaw Pdeng hakhmat ka surok.
Haba kren bad uwei na ki nonghikai vocational u bah Aibansuk Suchiang ula ong ba kin ap ia ka jubab kumba la kular u myntri rangbah ban khot iakren hynrei kin iai bteng ban iai dawa haduh ban ioh ia ka hok.
Jrup Hiar u Conrad na kali ba shah rah plakad ha ki nonghikai| khang na kyrpong ka pandal, wan sha Jaiaw Pdeng
